काठमाडौं । अमेरिकी राष्ट्रपति डोनाल्ड ट्रम्प सोमबार बिहान इजरायल आउने भएका छन् । इजरायलमा उनले हमासले रिहा गर्ने बन्धकहरूको पहिलो समूहलाई भेट्ने कार्यक्रम छ । यसबाहेक उनले इजरायली संसद नेसेटलाई पनि सम्बोधन गर्नेछन् ।

हमासले रिहा गर्ने बन्धकको सूचीमा नेपाली बन्धक बिपिन जोशीको नाम पनि समावेश छ । अन्तर्राष्ट्रिय मिडिया एजेन्सीहरूले रिपोर्ट गरेअनुसार उनी जीवितै रहेको अनुमान गरिएको छ । र, उनले रिहा भएसँगै राष्ट्रपति ट्रम्पलाई भेट्ने अपेक्षा गरिएको छ ।

ट्रम्प भोलि बिहान इजरायल आउने र ४ घण्टाको कार्यक्रमपछि फिर्ता जाने तालिका छ । उनले नेसेटमा सम्बोधन गर्ने र मुक्त गरिएका बन्धकहरूलाई भेट्ने एक इजरायली अधिकारीले द टाइम्स अफ इजरायललाई पुष्टि गरेका छन् । शुक्रबार इजरायली र अमेरिकी टोलीहरू बीच फोन वार्ता भएको थियो जसमा ट्रम्पको टोलीले यो “आउने र जाने” छोटो भ्रमण हुने बताएको अधिकारीले बताए।

च्यानल १२ ले स्रोत नखुलाइएको समय तालिकालाई उद्धृत गर्दै रिपोर्ट गरेअनुसार ट्रम्प बिहान ९:२० बजे इजरायलमा अवतरण गर्ने र दिउँसो १:०० बजे प्रस्थान गर्ने अपेक्षा गरिएको छ। इजरायलमा अवतरणपछि ट्रम्प नेसेटमा जानु अघि बेन गुरियन विमानस्थलमा एक संक्षिप्त कार्यक्रम आयोजना गरिनेछ जहाँ उनले बिहान ११:०० बजे प्लेनमलाई सम्बोधन गर्ने कार्यक्रम रहेको बताइएको छ।

आफ्नो भाषण अघि ट्रम्पले प्रधानमन्त्रीको कार्यालयमा इजरायली प्रधानमन्त्री बेन्जामिन नेतान्याहूसँग भेट गर्नेछन्। त्यसपछि दुई नेताहरूले नेसेटको चागल हलमा बन्धक बनाइएकाहरूका परिवारहरूसँग भेट गर्नेछन् । भाषणपछि ट्रम्प प्रस्थानको लागि विमानस्थल फर्कनेछन्। उनले त्यस दिन विश्व नेताहरूको माझमा इजिप्टको शर्म अल-शेखमा “शान्ति शिखर सम्मेलन” को सह-अध्यक्षता गर्ने अपेक्षा गरिएको छ।

होस्टेज एण्ड मिसिङ फेमिलीज फोरमले बोल्न निमन्त्रणा गरे पनि ट्रम्प ‘सुरक्षा कारणले गर्दा तेल अभिभको होस्टेज स्क्वायरमा रोकिने छैनन्’, अधिकारीले भने। कान सार्वजनिक प्रसारकले सुरुमा ट्रम्प आइतबार आइपुग्ने बताएको थियो । तर यति छोटो सूचनामा कार्यक्रम आयोजना गर्न कठिनाइ भएका कारण यात्रा एक दिन पछि सारिएको बताएको छ।

इजरायल र हमासले आफ्नो प्रस्तावित शान्ति सम्झौताको “पहिलो चरण” मा सहमति जनाएको घोषणा गरेपछि ट्रम्पले बिहीबार भनेका थिए – उनी आइतबार मध्य पूर्व जाने योजनामा ​​छन् र सोमबार वा मंगलबार बन्धकहरूलाई रिहा गर्दा आफू इजरायलमा हुने आशा राखेका छन्।