काठमाडौं । अर्जेन्टिनाका कप्तान लियोनेल मेस्सीले फिफा विश्वकप २०२६ को फाइनलमा स्पेनका युवा स्टार लामिने यामालविरुद्ध खेल्नु आफ्ना लागि एक ‘क्रेजी’ (अद्भुत) अनुभव हुने बताएका छन्। यसको मुख्य कारण करिब दुई दशक पुरानो एउटा ऐतिहासिक तस्बिर हो, जसमा मेस्सीले बाल्यकालका यामाललाई आफ्नो काखमा बोकेका थिए।

वास्तवमा, सन् २००७ मा यामालका मातापिताले बार्सिलोनामा आयोजित एउटा च्यारिटी फोटोसुट जितेका थिए। त्यसबेला २० वर्षीय मेस्सीले पाँच महिनाका शिशु यामाललाई टबमा नुहाउँदै काखमा लिएर तस्बिर खिचाएका थिए। अब करिब १९ वर्षपछि यी दुवै खेलाडी विश्वकपको फाइनलमा एकअर्काविरुद्ध मैदानमा उत्रँदैछन्।

न्युयोर्कमा आयोजित पत्रकार सम्मेलनका क्रममा उक्त भाइरल तस्बिरबारे प्रतिक्रिया दिँदै मेस्सीले भने, “त्यो तस्बिर साँच्चै गज्जबको छ। हामी दुवै जना (मेस्सी र यामाल) विश्वकप फाइनलमा सँगै खेल्दैछौँ, यो कति ‘क्रेजी’ कुरा हो।”

मेस्सीले यामालको खुलेर प्रशंसा गर्दै उनी वर्तमान समयमा विश्वकै उत्कृष्ट खेलाडीहरूको सूचीमा समावेश भइसकेको बताए। उनले थपे, “उनी एक सानदार खेलाडी हुन् र विश्वभर चिनिने स्टार बनिसकेका छन्। उनी भर्खर १९ वर्षका भए र उनको सम्पूर्ण खेल जीवन अझै अगाडि छ। म उनलाई भविष्यका लागि शुभकामना दिन्छु, तर हामी यस पटक उनलाई च्याम्पियन बन्न नदिन मैदानमा आफ्नो पूरै कोसिस गर्नेछौँ।”

१५ वर्षको कलिलो उमेरमै एफसी बार्सिलोनाको सिनियर टोलीका लागि डेब्यु गरेका यामालले हालै क्लबमा मेस्सीको प्रसिद्ध ‘१० नम्बर’ जर्सी लगाउन थालेका छन्। उनले हालै मात्र स्पेनलाई युइएफए यूरो २०२४ को उपाधि जिताउन अत्यन्तै महत्त्वपूर्ण भूमिका निर्वाह गरेका थिए।

अब १९ वर्षको उमेरमा यामालसामु युरोपेली च्याम्पियनसिप (यूरो कप) र फिफा विश्वकप दुवै जित्ने इतिहासकै सबैभन्दा कान्छा खेलाडी बन्ने सुनौलो र दुर्लभ अवसर रहेको छ।