बेइजिङ। तिब्बतमा आएको भीषण बाढीमा परी १०४ जना नेपालीसहित ५४६ जना बेपत्ता भएका छन्। चिनियाँ सरकारी टेलिभिजन (सीसीटीभी) का अनुसार बेपत्ता हुनेहरूमा २३ देशका २६१ जना विदेशी नागरिक रहेका छन्, जसमा सबैभन्दा ठूलो सङ्ख्या नेपालीको छ।

बाढीमा परी बेपत्ता भएका अन्य विदेशी नागरिकहरूमा भारतका ४९, लाटभियाका ३३, अमेरिकाका १८, बेलायतका १५ तथा क्यानडा र अष्ट्रेलियाका ६-६ जना रहेका छन्।

त्यसैगरी दक्षिण अफ्रिकाका ४, मलेसिया, जर्मनी र रसियाका ३-३ जना तथा फ्रान्स, न्युजिल्याण्ड, एस्टोनिया र आयरल्याण्डका २-२ जना बेपत्ता भएका छन्। फिनल्याण्ड, नेदरल्याण्ड, लिथुआनिया, पोर्चुगल, युक्रेन, स्पेन र हंगेरीका १-१ जना नागरिक पनि बाढीपछि सम्पर्कविहीन भएका छन्।

परराष्ट्र, सार्वजनिक सुरक्षा, संस्कृति तथा पर्यटन र आपत्कालीन व्यवस्थापन लगायतका निकायहरूको संयुक्त अनुसन्धानपछि चिनियाँ अधिकारीहरूले बेपत्ता नागरिकका सम्बन्धित दूतावास तथा कन्सुलर सेवाहरूलाई औपचारिक जानकारी गराइसकेका छन्।

बाढीका कारण तिब्बत र नेपालका सीमावर्ती क्षेत्रहरूमा ठूलो जनधनको क्षति भएको छ। प्रभावित क्षेत्रमा हाल खोजी तथा उद्धार कार्य तीव्र रूपमा जारी राखिएको छ।