काठमाडौं । मुम्बई इन्डियन्सले भारतीय पुरुष टोलीका पूर्व ब्याट्सम्यान रोबिन उथप्पालाई इन्डियन प्रिमियर लिग (आईपीएल) का लागि ब्याटिङ कोचको जिम्मेवारी सुम्पिएको छ।

मुम्बई इन्डियन्सले सामाजिक सञ्जाल ‘एक्स’ मा लेखेको छ, “हाम्रो पहिलो सिजनको हिस्सा बन्नेदेखि लिएर अनुभवको लामो यात्रा तय गर्दै पुनरागमन गर्दासम्म, रोबीमा खेलको गहिरो समझ छ।”

“उनको सञ्चार कौशल राम्रो छ र उनीसँग युवा खेलाडीहरूलाई सहि दिशा दिने क्षमता छ। ‘पलटन’ मा फेरि स्वागत छ, रोबिन। तपाईँ हाम्रो नयाँ ब्याटिङ कोच हुनुहुन्छ।”

यसैबीच, टोलीले न्युजिल्यान्डका पूर्व तीव्र गतिका बलर मिचेल म्याक्लेनघनलाई बलिङ कोचमा नियुक्त गरेको छ। उनी यसअघि मुम्बई इन्डियन्सका लागि आईपीएल पनि खेलिसकेका खेलाडी हुन्।

मुम्बई इन्डियन्सले ‘एक्स’ मा लेखेको छ, “उनी समर्थकहरूका मनपर्ने खेलाडीहरूमध्ये एक हुन्, जसले सधैँ टोलीप्रति आफ्नो समर्पण देखाए र मुम्बई इन्डियन्सको भावनालाई आफ्नो खेलमा उतारे। मिचेल म्याक्लेनघन, घर फिर्तीमा तपाईँलाई स्वागत छ।”