सुर्खेत । लगातारको अविरल वर्षाका कारण कर्णाली राजमार्गअन्तर्गत कालिकोटको गगने खोलामा ठूलो पहिरो खस्दा सुर्खेत–जुम्ला सडकखण्ड पूर्ण रूपमा अवरुद्ध भएको छ।

जिल्ला प्रहरी कार्यालय कालिकोटका अनुसार शनिबार साँझ ६:३० बजे लेदोसहितको पहिरो खसेपछि राजमार्गमा यातायात सेवा ठप्प भएको हो।

प्रतिकूल मौसम र रातिको समय भएकाले तत्काल पहिरो पन्छाउने काम कठिन भएको प्रहरीले जनाएको छ। आइतबार बिहानैदेखि उपकरण प्रयोग गरी पहिरो पन्छाउने र सडक सुचारु गर्ने तयारी गरिएको छ।

सडक अवरुद्ध भएकाले यात्रुहरूलाई राजमार्गको पछिल्लो अवस्थाबारे पूर्ण जानकारी लिएर मात्रै यात्रा तय गर्न जिल्ला प्रहरी कार्यालय कालिकोटले आग्रह गरेको छ।