काठमाडौं। नेपाल पर्वतारोहण संघका अध्यक्ष फुर गेल्जे शेर्पाले नेपालमा रहेका आठ हजार मिटरभन्दा माथिका थप ६ वटा चुचुराहरूको अन्तर्राष्ट्रिय मान्यता पाउनुपर्नेमा जोड दिएका छन्।

नेपाल सरकारद्वारा पर्वतारोहणका लागि खुला गरिएका थप ६ वटा चुचुराहरूले अन्तर्राष्ट्रिय पर्वतारोहण समितिद्वारा छुट्टै आठ हजार मिटरका चुचुराहरूको रूपमा मान्यता दिलाउनुपर्नेमा जोड दिएका हुन्।

नेपाल पर्वतारोहण संघकै आथित्यतामा विहीबार काठमाडौंमा आयोजना गरिएको अन्तर्राष्ट्रिय आरोहण तथा पर्वतारोहण महासंघ (यूआईएए)२०२६ को महासभाका अवसरमा आफ्‌नो धारणा राख्दै शेर्पाले थप ६ वटा हिमालहरुलाई आन्तर्राष्ट्रिय मान्यता दिनुपर्ने बताएका हुन्।

‘नेपाल सरकारद्वारा पर्वतारोहणका लागि खुला गरिएका थप ६ वटा चुचुराहरूले अन्तर्राष्ट्रिय पर्वतारोहण समितिद्वारा छुट्टै आठ हजार मिटरका चुचुराहरूको रूपमा मान्यता पाउनका लागि गम्भीर रूपमा विचार गरिनुपर्छ,’ उनले अगाडि भने,‘सरकारले धेरै वर्षदेखि हिमाल आरोहणका लागि अनुमति प्रदान गर्दै आएको छ। धेरै पर्वतारोहीहरूले यी ६ वटा चुचुराहरूमा आरोहण सम्पन्न गरेका छन्। उनीहरू सबैले आरोहण प्रमाणपत्रहरू पनि प्राप्त गरेका छन्, जसलाई नेपाल सरकारले अनुमोदन गरेको छ, तर अझै पनि अन्तर्राष्ट्रिय मान्यता प्राप्त गरेका छैनौँ। यसका अन्तर्राष्ट्रिय पर्वतारोहण समितिले पहल गर्नुपर्छ।’

६ वटा चुचुराहरूमध्ये चार वटा कञ्चनजङ्घा क्षेत्रमा र अन्य माउन्ट एभरेस्ट वा ल्होत्से क्षेत्रमा पर्ने गरेको जानकारी दिंदै उनले ति चुचुराहरुलाई आठ हजार मिटरको कुल सङ्ख्यामा समावेश गर्न चाहेको उल्लेख गरे।

‘यो मुद्दा पूर्वसहकर्मी र नेपाल पर्वतारोहण सङ्घका पूर्व कार्यकारी समिति र सदस्यहरूले वर्षौंदेखि उठाउँदै आएका छन्। दुर्भाग्यवश, यसले अहिलेसम्म खोजेको मान्यता पाउन सकेको छैन। ६ वटा चुचुराहरू आफ्नै नामले चिनिन्छन् र स्थानीय समुदायहरूद्वारा छुट्टै चुचुराहरूको रूपमा मान्यता प्राप्त छन्। प्रत्येकको आफ्नै भौगोलिक पहिचान छ र यसको शिखरमा पुग्ने छुट्टै मार्ग छ। एउटा शिखरमा चढ्नुको मतलब अर्कोमा पुग्नु होइन। प्रत्येकको छुट्टै पर्वतारोहण उद्देश्य छ र यसका लागि छुट्टै अभियानको आवश्यकता पर्दछ,’ प्रष्ट पार्दै अगाडि भने,‘हामीले आठ हजार मिटरभन्दा माथि चढ्नुलाई असाधारण चुनौतीलाई पनि सराहना गर्नुपर्छ। अत्यधिक उचाइमा गरिने प्रत्येक अभियानमा असाधारण प्रयास, प्राविधिक क्षमता, अनुभव र सावधानीपूर्वक तयारीको आवश्यकता पर्दछ। आठ हजार मिटरभन्दा माथिको छुट्टै शिखरले महत्त्वपूर्ण पर्वतारोहण उपलब्धिको प्रतिनिधित्व गर्छ त्यसैले यसको अन्तर्राष्ट्रिय मान्यता पाउनुपर्छ।’

अन्तर्राष्ट्रिय पर्वतारोहण समुदायलाई उपयुक्त भौगोलिक, वैज्ञानिक र अन्तर्राष्ट्रिय पर्वतारोहण मापदण्डहरू अनुसार थप ६ वटा चुचुराहरूलाई छुट्टै आठ हजार मिटरका हिमालहरूको रूपमा औपचारिक मान्यता दिलाउन उनले जोड दिएका थिए।