काठमाडौं । नेपालका लागि भारतीय राजदूत विनयमोहन क्वात्राले कोरोना भाइरस (कोभिड–१९) नियन्त्रणका लागि
नेपालले गरेको प्रयास दक्षिण एशियाका लागि उदाहरणिय रहेको बताएका छन् । भारत सरकारले सहयोग गरेका अत्यावश्यक औषधि हस्तान्तरण गर्दै राजदूत क्वात्राले कोभिड—१९ नियन्त्रणका लागि नेपालको प्रयास उदाहरणिय रहको बताएका छन् ।

विश्वव्यापी महामारीका रुपमा रहेका कोभिड—१९ महामारीको सशक्त र सकारात्मक रुपले नेपाल र नेपाली जनताले गरिरहेका सामना प्रशंसनिय मात्रै नभएर एसिया क्षेत्रका लागि उदाहरणिय रहेको उनले बताए । नेपालसँगै क्षेत्रिय देशभित्र सकारात्मक सहयोग महत्वपूर्ण रहेको उल्लेख गर्दै राजदूत क्वात्राले भने, ‘पहिलो चरणमा २३ टन औषधि हस्तान्तरण भएको छ । यो भारत सरकार र भारतीय जनताको तर्फबाट भएको सहयोगको उदाहरण हो । अर्को हप्ता थप सहयोग गर्ने वाचा पनि गर्दछौँ ।’

सङ्कटको यस घडीमा नेपाल तथा अन्य दक्षिण एसियाली साझेदार मुलुकहरुसँग एकसाथ तयारी गर्न, कदम चाल्न र सफलता प्राप्त गर्न भारत प्रतिबद्घ रहेको उनले बताए।

सहयोग सामग्री बुझ्दै स्वास्थ्य तथा जनसंख्यामन्त्री भानुभक्त ढकालले जस्तोसुकै अफ्ठ्यारो परिस्थितिमा पनि भारतले नेपाललाई सहयोग गर्न गर्छ भन्ने उदारहण दिएको बताए। आफुलाई परेको अफ्ठ्यारोमा पनि छिमेकीको नाताले भारतले गरेको सद्भाव र सहयोगका लागि मन्त्री ढकालले धन्यवाद ज्ञापन गरेका छन्।

भारत सरकारले विभिन्न १८ किसिमका २३ टन औषधि नेपाललाई दिएको हो । प्राप्त सहयोग नेपालका लागि भारतीय राजदूत क्वात्राले स्वास्थ्यमन्त्री ढकाललाई एक कार्यक्रमकाबीच हस्तान्तरण गरेका छन् । पारासिटामोलको ३.२ लाख डोज र हाईड्रोक्सीक्लोरोक्वीनको २.५ लाख डोेज गरीे कुल ८.२५ लाख डोज अत्यावश्यक औषधिहरु नेपाललाई सहयो गरेको हो ।

औषधिहरु विभिन्न चरणमा प्राप्त हुने मन्त्रालयले जनाएको छ । यसैबीच बुधबार चीनको तिब्बत सरकारले पनि विभिन्न स्वास्थ्य सामग्री सहयोग गरेको छ । १० हजार एन ९५ मास्क, १० हजार थान पिपिइ र एक हजार थान इन्फ्रारेड थर्मोमिटर सहयोग गरेको मन्त्रालयले जनाएको छ । यस्तै दुई वटा पिसिआर मेसिन, भिटिएमसहित २० हजार थान टेस्टिङ किट, ५० बक्स डिसइन्फेक्सन वेट वाइप पनि दिएको छ ।

सो स्वास्थ्य सामग्री चिनियाँ अधिकारीहरुले बुधबार तातोपानी नाकाबाट नेपाली पक्षलाई हस्तान्तरण गरेको छ । बुधबार साँझासम्म स्वास्थ्य सामग्री काठमाडौं आइपुग्ने स्वास्थ्य तथा जनसंख्या मन्त्रालयका प्रवक्ता डा. विकास देवकाटोले बताए ।