काठमाडौं। नेपालमा एलपी ग्यासको दैनिक आयातमा उल्लेख्य गिरावट आएको छ। अर्थ मन्त्रालय मातहतको भन्सार विभागको तथ्यांक अनुसार भदौ २५ गतेको तुलनामा भदौ २६ गते एलपी ग्यासको कुल आयात ४०.८ प्रतिशतले घटेको हो।

भदौ २५ गते ३,०७७.९ मेट्रिक टन (करिब २ लाख १६ हजार ७५४ सिलिन्डर) ग्यास आयात भएकोमा भदौ २६ गते घटेर १,८२२.३ मेट्रिक टन (करिब १ लाख २८ हजार ३३२ सिलिन्डर) मा सीमित भएको छ।

भन्सार नाकाअनुसार वीरगञ्ज भन्सारबाट हुने आयातमा ठूलो संकुचन आएको छ। भदौ २५ गते २,१२९.०१ मेट्रिक टन (१,४९,९३० सिलिन्डर) भित्रिएको वीरगञ्जबाट भदौ २६ मा ६२.६ प्रतिशतले घटेर ७९७.१ मेट्रिक टन (५६,१३४ सिलिन्डर) मा झरेको छ। समग्र आयातमा गिरावट आउनुको मुख्य कारण वीरगञ्ज नाकाको यही कटौती हो।

अन्य नाकातर्फ, भैरहवा भन्सारबाट ग्यास आयात ७.८ प्रतिशतले बढेर ३६४.५ मेट्रिक टन (२५,६७० सिलिन्डर) र नेपालगञ्ज भन्सारबाट १४.२ प्रतिशतले बढेर २८३.० मेट्रिक टन (१९,९३० सिलिन्डर) पुगेको छ। त्यस्तै मेची भन्सारबाट आयात चार गुणाभन्दा बढीले वृद्धि भई ७१.२ मेट्रिक टन (५,०१४ सिलिन्डर) भित्रिएको छ।

यता विराटनगर भन्सारबाट भने ग्यास आयात ११.२ प्रतिशतले घटेर ३०६.५ मेट्रिक टन (२१,५८५ सिलिन्डर) मा झरेको छ भने धनगढी नाकाबाट भदौ २६ गते कुनै पनि ग्यास बोकेका मालवाहक गाडी नेपाल प्रवेश गरेका छैनन्।