काठमाडौं। बेलायतको एक बैंकले आफ्ना कर्मचारीलाई हप्तामा तीन दिन विदा दिने घोषणा गरेको छ । यसवापत बैंकले पारिश्रमिकमा कुनै कटौती गर्ने छैन । यस किसिमको कदम उठाउने यो बेलायतको अहिलेसम्मकै सबैभन्दा ठूलो कम्पनी भएको बताइएको छ । एटम बैंकले मंगलबार आफ्ना ४३० कर्मचारीहरुको लागि हप्ताभरीमा काम गर्ने घण्टा पनि घटाएर ३४ घण्टा कायम गरिएको बताएको छ ।

कम्पनीका धेरैजसो कर्मचारी सोमबारदेखि वा शुक्रबारदेखि विदामा हुनेछन् । बैंकले यो नीति नोभेम्बर १ देखि लागू गरेको हो । यसलाई बैंकका कर्मचारीको मानसिक र शारीरिक स्वास्थ्य र उत्पादनशीलतालाई ध्यानमा राख्दै लागू गरिएको छ । कम्पनीका धेरैजसो कर्मचारी कम्पनीको नयाँ वर्क विक पोलिसी अन्तर्गत काम गरिरहेका छन् । बैंकका सीइओ मार्क मुलेनले आफ्नो बयानमा भनेका छन् ‘४ दिन काम गर्ने नीतिले हाम्रा कर्मचारीलाई उत्साहका साथ काम गर्ने अवसर दिनेछ । उनीहरुले परिवारलाई पर्याप्त समय दिन पाउनेछन् । यसबाट उनीहरुको निजी जीवन र व्यवसायिक जीवनमा तालमेल बन्नेछ ।’