काठमाडौं । अमेरिकी राष्ट्रपति जो बाइडेनले पाकिस्तानलाई लिएर विवादित बयान दिएका छन् । उनले भने- मलाई लाग्छ विश्वको सबैभन्दा खतरनाक देशमध्ये एक पाकिस्तान हो। ह्वाइट हाउसले बाइडेनको यो वक्तव्य जारी गरेको हो । बाइडेनले डेमोक्रेटिक कंग्रेसनल क्याम्पेन कमिटीको स्वागत समारोहमा यस्तो बताएका हुन् ।

गत महिना, सेप्टेम्बर ८ मा, बाइडेन प्रशासनले, ट्रम्प प्रशासनको निर्णयलाई उल्टाउँदै, एफ-१६ लडाकू जेटको लागि पाकिस्तानलाई ४५० मिलियन डलर को उपकरण खरिद गर्न सहयोग अनुमोदन गर्यो। यो निर्णयलाई भारतका लागि झट्का मानिएको छ । ट्रम्प प्रशासनले अफगानिस्तानमा तालिबान कट्टरपन्थी र हक्कानी नेटवर्कलाई संरक्षण र सहयोग गरेको कारण पाकिस्तानलाई सैन्य सहायता रोकेको थियो।

भारतले पाकिस्तानलाई सैन्य सहायता दिएकोमा कडा आपत्ति जनाएको थियो। रक्षामन्त्री राजनाथ सिंहले आफ्ना अमेरिकी समकक्षी लोयड अस्टिनलाई फोन गरेर भारतको हित प्रभावित हुने बताएका थिए । यसपछि अमेरिकाका सहायक रक्षा सचिव एली रेटनरले पाकिस्तानलाई स्वीकृत सहायताले भारतलाई कुनै प्रकारको असर नपर्ने बताए । यो सहायता अमेरिकाको हितलाई ध्यानमा राखेर र पाकिस्तानसँगको सैन्य सहयोगमा स्वीकृत गरिएको हो । यसले पाकिस्तानको आणविक हतियारको पनि सुरक्षा गर्नेछ।

पाकिस्तानका लागि अमेरिकी राजदूत डोनाल्ड ब्लमले अक्टोबर ४ मा पाकिस्तान प्रशासित कश्मीरको मुजफ्फराबादको भ्रमण गरेका थिए। यहाँ उनले पाकिस्तान-अमेरिका अलमनाईका सदस्यहरूसँगको बैठकमा भाग लिए। योसँगै अमेरिकी दूतावासको आधिकारिक ट्विटर ह्यान्डलबाट एउटा ट्वीट गरिएको छ, जसमा पाकिस्तान प्रशासित कश्मीरलाई आजाद जम्मू कश्मीर लेखिएको छ।

ट्वीटमा लेखिएको छ, ‘राजदूत ब्लोमले पाकिस्तान युएस अलमनाईका सदस्यहरूलाई मुजफ्फराबाद बैठकमा स्वागत गर्दछन्। यो संसारमा सबैभन्दा ठूलो अमेरिकी पूर्व छात्र कार्यक्रम हो। आजाद जम्मू कश्मीरमा रहेको पाकिस्तान-अमेरिकी अलमनाई नेटवर्कमा ९५० सदस्य छन्। हामी यस पूर्व छात्रको जोशमा गर्व गर्छौं। उनीहरुले अमेरिका–पाकिस्तान सम्बन्धलाई मजबुत बनाउन महत्वपूर्ण भूमिका खेलिरहेका छन् ।