काठमाडौं । सार्वजनिक रूपमा कुरान जलाउने कैयौं घटनामा इस्लामिक देशहरूको कडा प्रतिक्रिया आएपछि अब डेनमार्क सरकारले सार्वजनिक रूपमा कुरान जलाउन प्रतिबन्ध लगाउने विचार गरिरहेको छ।

डेनमार्कका न्यायमन्त्री पिटर ह्यामगार्डले यस्ता घटनाले डेनमार्कलाई नोक्सान पुर्याएको र डेनमार्कका नागरिकका लागि खतरा उत्पन्न भएको बताएका छन् ।

प्रस्तावित कानून अनुसार कुरान वा बाइबल जस्ता पवित्र ग्रन्थहरूको अपमान गरेमा अपराध मानिनेछ र दुई वर्षसम्म जेल सजाय र जरिवाना हुनेछ।

डेनमार्कको सेन्टर-लेफ्ट सरकारले विश्वलाई सन्देश पठाउन चाहेको बताएको छ।

डेनमार्कका विदेशमन्त्री लार्स लोकके रासमुसेनका अनुसार हालैका महिनाहरूमा देशमा विदेशी दूतावासहरू अगाडि कुरानको प्रतिहरू जलाउनेलगायत १७० प्रदर्शनहरू भएका छन्।

छिमेकी राष्ट्र स्वीडेनमा पनि कुरान जलाउने धेरै घटना भएका छन् र स्वीडेनले यसबाट अवस्था बिग्रन सक्ने बताएको छ ।

जुलाईमा, इराकमा स्विडेनी दूतावासलाई क्रोधित प्रदर्शनकारीहरूले आगो लगाए।

स्वीडेन र डेनमार्क दुवैले अभिव्यक्ति स्वतन्त्रतामा आफ्नो उदार कानूनको कारण यी घटनाहरूको प्रतिक्रिया दिन अनिच्छुक थिए। स्वीडेनमा १९७० को दशकमा निन्दासम्बन्धी कानुन खारेज गरिएको थियो।

यसै क्रममा इस्लामिक देशहरूको संगठन ओआईसीले आफ्ना सदस्य राष्ट्रहरूलाई कुरानको अपमान गर्ने देशहरूविरुद्ध कारबाही गर्न भनेको थियो।

डेनमार्कका न्याय मन्त्रीले प्रस्तावित कानून अन्तर्गत मौखिक टिप्पणी वा व्यंग्यात्मक तस्बिरहरू प्रतिबन्धित नहुने बताएका छन्। तर, धार्मिक ग्रन्थ जलाएर मानिसमा विभेद सिर्जना गर्नुबाहेक अन्य काम नहुने उनको भनाइ छ ।