काठमाडौं । नेकपा एमालेकी जिल्ला कमिटी इलामकी सदस्य युवन्तिका तामाङ भनेर चिनिन खोजेकी युवन्तिका राई झुटो विवरण पेश गरेर नक्कली नागरिकता लिएको कसुरमा दोषी ठहर भएकी छिन् । चितवन जिल्ला अदालतका न्यायाधीश केदारनाथ पौडेलले मंगलबार उनलाई दोषी ठहर गरेका हुन् ।

राई दोषी ठहरिएसँगै न्यायाधीशले उनलाई सजाय सुनाउनको लागि अर्को पेशी तोकेका छन् । अबको सुनुवाइमा उनीविरुद्ध सजाय निर्धारण हुनेछ । आफूलाई बुवाको रुपमा पेश गरेर युवन्तिकाले नक्कली नागरिकता बनाएको तर उनी आफ्नी छोरी नभएको दावीसहित चितवनका छविलाल तामाङले मुद्दा दायर गरेका हुन् ।

प्रधानमन्त्री केपी शर्मा ओलीको नजिकमा पटक–पटक देखिएकी उनलाई एमालेले नै संरक्षण गरेको आरोप लाग्दै आएको थियो । उनी एमालेका प्रभावशाली नेता तथा पूर्व सभामुख सुवास नेम्वाङको परिवारको पनि निकट रहेको बताइन्छ ।

नेम्वाङको निधनपछि भएको इलाम १ को उपनिर्वाचनमा नेम्वाङकै छोरा सुहाङ एमालेका उम्मेदवार बनेपछि युवन्तिकाले उनको प्रचारप्रसार समेत गरेकी थिइन् । सुहाङको चुनावी सभामा एमाले अध्यक्ष ओली पनि पुगेका थिए र युवन्तिका ओलीकै अगाडि नाचेकी थिइन् ।

नक्कली नागरिकताकै आधारमा पर्वतारोहणको इजाजतपत्र लिएकी युवन्तिकाले सगरमाथा आरोहण पनि गरेकी थिइन् । त्यसपछि उनलाई इलाम क्षेत्र नम्बर २ का सांसद महेश बस्नेतले २०७९ को मंसिर अन्तिम साता सम्मान समेत गरेका थिए ।

मुद्दा विचाराधीन भएकै अवस्थामा गएको जेठमा भएको नेकपा एमाले इलामको अधिवेशनमा युवन्तिका आदिवासी जनजाति महिला कोटाबाट एकालेको जिल्ला कमिटी सदस्यमा समेत निर्वाचित भइसकेकी छिन्।