काठमाडौं। जीपी कोइराला मेमोरियल कलेज, चावहिलमा अध्यापनरत प्राध्यापक तथा कर्मचारीका विभिन्न माग पूरा नभएको भन्दै अनिश्चितकालीन तालाबन्दी गरिएको छ।

पब्लिक क्याम्पस प्राध्यापक संघ, प्रजातन्त्रवादी प्राध्यापक संघ र नेपाल राष्ट्रिय प्राध्यापक संगठनले संयुक्त रूपमा तालाबन्दी गरेका हुन्।

संघ-संस्थाले कलेजको शैक्षिक, प्रशासनिक तथा आर्थिक गतिविधि व्यवस्थित रूपमा सञ्चालन गर्न पटक–पटक ध्यानाकर्षण गराउँदा पनि कलेज प्रशासनले बेवास्ता गरेको आरोप लगाएका छन्।

गत साउन १५ को ध्यानाकर्षण पत्र, भदौ ८ को विज्ञप्ति, कात्तिक १९ को पुनःध्यानाकर्षण तथा कात्तिक २८ को २४ घण्टे अल्टिमेटमसमेत बेवास्ता भएपछि बाध्य भएर तालाबन्दी गरिएको जनाइएको छ।