काठमाडौं। राजेन्द्र लिङ्देन नेतृत्वको राप्रपा र कमल थापा नेतृत्वको राप्रपा नेपालबीच एकता भएको छ।

बुधबार काठमाडौंमा आयोजित एक कार्यक्रमकाबीच दुई पार्टीबीच एकताको घोषणा गरिएको हो। कार्यक्रममा लिङ्देन र थापाले एकीकरणसम्बन्धी ६ बुँदे आधारपत्रमा हस्तक्षर गरेका थिए।

एकीकरणसम्बन्धी आधारपत्रमा पूर्ण धार्मिक स्वतन्त्रसहितको सनातन धर्म सापेक्ष हिन्दुअधिराज्य राजसंस्थासहितको लोकतन्त्र, सुदृढ स्थानीय स्वायत्त शासन, उदार अर्थतन्त्र र असंलग्न परराष्ट्र नीतिको सिद्धान्त मार्ग दर्शन हुने उल्लेख छ।

त्यस्तै राप्रपाका अध्यक्ष लिङ्देन पार्टीको अध्यक्ष रहने, राप्रपाको एकता महाधिवेशनबाट केन्द्रीय समितिमा निर्वाचित भएर पछि राप्रपा नेपाल रोजेकाहरुलाई सोही जिम्मेवारीमा फर्काइने उल्लेख छ।

एकता घोषणा कार्यक्रममा राप्रपाका अध्यक्ष राजेन्द्र लिङ्देनले पार्टीका अग्रजहरूसँगै आएसँगै अब पार्टी थप बलियो हुने बताए। उनले कमल थापा नहुँदाको राप्रपा सदैव अपूर्णजस्तो लाग्ने गरेको भन्दै अब मनमा रहेको एक प्रकारको रिक्तता हटेर गएको उल्लेख गरे।

पार्टी एक्लैले नभई सबै मिलेर चलाउने भएकाले राप्रपा नेपालबाट आएका कुनै पनि सदस्यहरूले अन्यथा लिन नहुने उनले बताए। लिङ्देनले सिद्धान्त र बिचार स्पष्ट नभइ केहि नयाँ भनिने दलहरुले एकताका नाममा प्रधानमन्त्री पदको दलाली गरेको टिप्पणी गरे।

पूराना दलहरूलाई समेत जनताले विश्वास नगरेको अवस्थामा बिचारमा स्पष्ट र विचलित पार्टी राप्रपा बाहेक अरु कोहि नरहेको उनको भनाइ छ।

त्यस्तै राप्रपाका फर्कनुभएका नेता कमल थापाले दुई पार्टीबीच एकता भनिएपनि पुनर्मिलन जस्तै भएको बताए। आफूले पनि रगतपसिना बगाएर बनाएको घर फर्किदाको जस्तो अनुभूति आफूलाई भएको उनले बताए। उनले पार्टीका मुद्दा स्थापीत गर्न आन्दोलन बाहेकको अरु कुनै बिकल्प नरहेको धारणा राखे।

दुईपार्टीबीच एकताको आधारपत्रमा २०७८ मंसिरमा सम्पन्न एकता महाधिवेशन हुँदाका बखत कायम रहेका वडा, गाउँ, नगर र जिल्ला तहका पदाधिकारी सदस्यलाई तत् तत् जिल्लामा सम्मानजनक ढंगबाट गर्दै लगिने सहमति भएको छ भने राप्रपा नेपालका संयोजित संगठनका पदाधिकारी र सदस्यलाई राप्रपाको सम्बन्धीत भातृसंगठनमा सम्मानजनक ढंगले समायोजन गर्ने सहमति भएको छ। चार वर्षअघि भएको महाधिवेशनमा राप्रपाको अध्यक्ष पदमा लिङ्देनसँग पराजित भएपछि थापाले पार्टी छाडेर राप्रपा नेपाल गठन गरेका थिए।