ढोरपाटन (बागलुङ)। बागलुङको ढोरपाटन र पूर्वी रुकुमको तकसेरा सिधा सडक सञ्जालमार्फत जोडिएपछि दुई जिल्लाबीचको आवतजावत सहज भएको छ।

गत फागुन १६ गते बागलुङको निसेलढोर हुँदै रुकुम पूर्वको पुथा उत्तरगङ्गा गाउँपालिकाको मनिमर्फेस क्षेत्रमा सडकको ‘ट्रयाक’ जोडिएसँगै ढोरपाटन–तकसेरा सडक सञ्चालनमा आएको हो।

नेपालको एक मात्र सिकार आरक्ष रहेको ढोरपाटन क्षेत्रमा लामो समयदेखि रोकिएको सडक निर्माण कार्य ढोरपाटन सिकार आरक्ष कार्यालयबाट अनुमति प्राप्त भएपछि सम्पन्न भएको हो। सडक सञ्चालनमा आएपछि बागलुङको निसीखोला गाउँपालिका, ढोरपाटन नगरपालिका तथा रुकुम पूर्वको पुथा उत्तरगङ्गा गाउँपालिकाका स्थानीयलाई आवतजावत र दैनिक उपभोग्य सामग्री ढुवानीमा सहज भएको छ।

ढोरपाटनका स्थानीय खुमबहादुर विश्वकर्माले सडक सञ्चालनसँगै वर्षौँदेखिको यात्राको कठिनाइ अन्त्य भएको बताउनुभयो। उहाँका अनुसार यसअघि ढोरपाटनबाट तकसेरा पुग्न दिनभर पैदल हिँड्नुपथ्र्यो भने अहिले सवारीसाधनमार्फत छोटो समयमै यात्रा गर्न सकिने भएको छ।

उनले भने, “पुथा उत्तरगङ्गा र ढोरपाटनवासीबीच रोटीबेटीको सम्बन्ध छ। यो सडकले दुई जिल्लाका स्थानीयबीचको सम्बन्धलाई अझ बलियो बनाएको छ। व्यापारदेखि दैनिक आवतजावतसम्म सबै क्षेत्रमा सहजता आएको छ।”

सडक सञ्चालनसँगै पश्चिम बागलुङ र पूर्वी रुकुमबीचको यात्रा दूरीसमेत छोटिएको छ। यसअघि बुर्तिवाङ बजारदेखि निसेलढोरसम्म सडक पुगे पनि त्यसभन्दा माथिको खण्ड निर्माण हुन नसक्दा सिधा सडक सम्पर्क स्थापित हुन सकेको थिएन। बुर्तिवाङदेखि ढोरपाटनसम्म ३१ किलोमिटर र ढोरपाटनदेखि तकसेरासम्म ३७ किलोमिटर दूरी रहेको छ।

पुथा उत्तरगङ्गा गाउँपालिका–१ का थमबहादुर पुनका अनुसार यसअघि तकसेराका बासिन्दाले मध्यपहाडी लोकमार्ग हुँदै रुकुमको काँक्री भएर लामो दूरी पार गर्नुपर्ने बाध्यता थियो। अहिले ढोरपाटन–तकसेरा सडक सञ्चालनमा आएपछि तकसेरासहित आसपासका गाउँ सिधैँ बुर्तिवाङ बजारसँग जोडिएका छन्।

ढोरपाटनदेखि सडकको ‘ट्रयाक’ खोल्न चालु आर्थिक वर्षमा ढोरपाटन नगरपालिकाले रु १२ लाख ५० हजार विनियोजन गरेको थियो। सोही बजेटबाट सडक निर्माण सम्पन्न भएको नगरपालिकाले जनाएको छ। सडक सञ्चालनसँगै तकसेराका स्थानीयलाई बागलुङ हुँदै पोखरा र काठमाडौं पुग्न दूरी छोटिएको छ भने स्थानीय कृषि तथा पशुजन्य उत्पादनको बजारीकरणमा टेवा पुग्ने अपेक्षा गरिएको छ। रासस