भद्रपुर (झापा)। जिल्ला प्रहरी कार्यालय झापाले पछिल्लो एक वर्षको अवधिमा जिल्लाबाट हराएका अधिकांश व्यक्तिको सफलतापूर्वक खोजी गरेको छ। प्रहरीको वार्षिक तथ्याङ्कअनुसार विभिन्न स्थानबाट हराएका भन्दै ६६७ जनाको हुलिया दर्ता भएकामा ६५३ जना फेला परिसकेका छन् भने १४ को खोजी जारी रहेको जनाइएको छ।

जिल्ला प्रहरी कार्यालय झापाका सूचना अधिकारी एवं प्रहरी नायब उपरीक्षक रञ्जन अवाका अनुसार प्रहरीको सक्रिय खोजी, अनुसन्धान तथा सरोकार भएका निकायसँगको समन्वयका कारण अधिकांश हराएका व्यक्ति सुरक्षित रूपमा फेला परेका हुन्। बाँकी १४ जनाको खोजी कार्य पनि निरन्तर जारी रहेको उनले जानकारी दिए।

यसैबीच, झापामा गत आर्थिक वर्षमा दर्ता भएका घरेलु तथा महिला हिंसासम्बन्धी सबै उजुरी फछ्र्यौट गरिएको प्रहरीले जनाएको छ। प्रहरीका अनुसार जिल्लाभर घरेलु तथा महिला हिंसासम्बन्धी १२३ वटा उजुरी दर्ता भएकामा सबै उजुरीको आवश्यक प्रक्रिया पूरा गरी समाधान गरिएको हो।

महिला, बालबालिका तथा ज्येष्ठ नागरिक सेवा केन्द्रको सक्रिय पहलमा घटनाको प्रकृतिअनुसार कानुनी कारबाही, सचेतनामूलक परामर्श तथा दुवै पक्षबीच संवादमार्फत मेलमिलाप गराएर उजुरी टुङ्ग्याइएको प्रहरी नायब उपरीक्षक अवाले बताए।

उनका अनुसार यस्ता घटनामा उजुरी प्राप्त हुनासाथ प्रहरीले आवश्यक अनुसन्धान र कानुनी प्रक्रिया अघि बढाउँदै पीडितलाई न्याय दिलाउने तथा विवाद समाधान गर्ने कार्यलाई प्राथमिकताका साथ अघि बढाउँदै आएको छ।