काठमाडौं। बसाइँसराइ र वैदेशिक जीवनशैली सम्बन्धी अध्ययन गर्ने संस्था ‘इन्टरनेसनल्स’ ले सार्वजनिक गरेको ‘एक्सप्याट इन्साइडर २०२६’ सर्वेक्षण अनुसार वैदेशिक जीवन बिताउनका लागि पानामा पुनः विश्वकै सर्वोत्कृष्ट गन्तव्य बनेको छ।

जीवनस्तर, बसोबासको सहजता, वैदेशिक रोजगारी, व्यक्तिगत वित्त र व्यावहारिक सुविधाहरू गरी ३१ वटा गन्तव्यहरू माथि गरिएको यस सर्वेक्षणमा पानामा लगातार तेस्रो वर्ष पहिलो स्थानमा पर्न सफल भएको हो।

पानामामा बस्ने ८७ प्रतिशत विदेशीहरू आफ्नो जीवनशैलीबाट सन्तुष्ट रहेको र ९० प्रतिशतले आवास भेट्टाउन सहज रहेको बताएका छन्। त्यहाँको स्थिर अर्थतन्त्र, कम कर प्रणाली, र सुस्त तथा सहज जीवनशैलीले गर्दा विदेशीहरू आकर्षित हुने गरेका छन्।

सर्वेक्षणको दोस्रो स्थानमा मेक्सिको र तेस्रो स्थानमा थाइल्यान्ड रहेका छन्। मेक्सिको घुलमिल हुन र स्थानीय साथीहरू बनाउन विश्वकै सबैभन्दा सहज देशका रूपमा देखिएको छ, जहाँ ७३ प्रतिशत विदेशीहरूले सजिलै स्थानीय मित्रहरू बनाएको बताएका छन्।

यस्तै तेस्रो स्थानमा रहेको थाइल्यान्ड जीवनयापनको लागतका हिसाबले सबैभन्दा सस्तो र विदेशीहरूका लागि विश्वकै सबैभन्दा खुसी देश साबित भएको छ, जहाँका ८६ प्रतिशत विदेशीहरू आफ्नो वैदेशिक जीवनबाट पूर्ण रूपमा सन्तुष्ट छन्।

यसैगरी चौथो स्थानमा संयुक्त अरब इमिरेट्स  र पाँचौँ स्थानमा ब्राजिल पर्न सफल भएका छन्। यूएई रोजगारीका अवसर र भाषा तथा भिसाको सहजताका लागि उत्कृष्ट मानिएको छ भने ब्राजिल स्थानीय मानिसहरूको न्यानो आतिथ्य र सांस्कृतिक सामीप्यताका कारण पहिलोपटक शीर्ष पाँचभित्र पर्न सफल भएको हो।

शीर्ष १० भित्र पर्न सफल अन्य देशहरूमा छैटौं स्थानमा स्पेन, सातौंमा सिंगापुर, आठौंमा पोर्चुगल, नवौंमा मलेसिया र दसौं स्थानमा लक्जमबर्ग रहेका छन्। सर्वेक्षणमा सहभागी विदेशीहरूका अनुसार नयाँ देशमा बसोबास गर्दा स्थानीय भाषा, संस्कृति र परम्पराको सम्मान गर्नु अत्यन्तै महत्त्वपूर्ण हुने गर्दछ।

विशेष गरी कम खर्चमा उच्च जीवनस्तर, सहज प्रशासनिक प्रक्रिया र सुरक्षित वातावरण भएका देशहरू नै वैदेशिक जीवन बिताउन चाहनेहरूका लागि पहिलो रोजाइ बन्ने गरेको यस अध्ययनले देखाएको छ।