काठमाडौं। देशका विभिन्न स्थानबाट अवैध लागूऔषधसहित प्रहरीले पाँच जनालाई पक्राउ गरेको छ।

सुनसरीको इनरूवा नगरपालिका-३ सहमति चोकबाट ब्राउनसुगर जस्तो देखिने पदार्थ २ ग्राम १ सय १० मिलिग्रामसहित दुई जना मङ्गलवार राति पक्राउ परेका छन्।

पक्राउ पर्नेहरूमा मोरङ सुन्दरहरैँचा नगरपालिका-५ का २१ वर्षीय युवराज खत्री र २१ वर्षीय अमृत साह रहेका छन्। जिल्ला प्रहरी कार्यालय सुनसरीबाट खटिएको टोलीले उनीहरूलाई नियन्त्रणमा लिएको हो।

यसैगरी सुनसरीकै भोक्राहा नरसिंह गाउँपालिका-३ शिवचोकबाट अवैध लागूऔषध गाँजा २४ ग्राम ६ सय २० मिलिग्राम, स्पास्मो ४ ट्याब्लेट र नाइट्राजेपाम १२ ट्याब्लेटसहित सोही गाउँपालिका-२ अखाह बजारका २८ वर्षीय हजरत अली बुधबार बिहान पक्राउ परेका छन्। उनलाई इलाका प्रहरी कार्यालय लौकहीको टोलीले पक्राउ गरेको हो।

उता कपिलवस्तुको वाणगंगा नगरपालिका-११ वरूवाबाट ब्राउनसुगर जस्तो देखिने पदार्थ ४ ग्राम ४ सय ५० मिलिग्रामसहित रूपन्देही बुटवल उपमहानगरपालिका-१३ का ३१ वर्षीय जनक गुरूङ बुधबार बिहान पक्राउ परेका छन्। उनलाई अस्थायी प्रहरी पोष्ट भड्डिहवाबाट खटिएको टोलीले नियन्त्रणमा लिएको हो।

त्यस्तै कैलालीको गोदावरी नगरपालिका-१ अत्तरीयाबाट खैरो हेरोइन जस्तो देखिने पदार्थ ११ ग्राम २ सय ८० मिलिग्रामसहित धनगढी उपमहानगरपालिका-७ क्याम्पसरोडका ३१ वर्षीय हितेश साहु बुधबार दिउँसो पक्राउ परेका छन्। सुदूरपश्चिम प्रदेश प्रहरी कार्यालय धनगढीसहितको टोलीले उनलाई पक्राउ गरी थप अनुसन्धान अघि बढाएको छ।