पाल्पा। पाल्पाको माथागढी र रिब्दीकोट गाउँपालिकामा खसेको पहिरोमा परी दुई जनाको मृत्यु भएको छ भने तीन जना बेपत्ता भएका छन्।

जिल्ला प्रहरी कार्यालय पाल्पाका प्रहरी नायब उपरीक्षक भीमलाल भट्टराईका अनुसार माथागढी गाउँपालिका-२, रुप्से रजौलीका ७५ वर्षीय शेरबहादुर चिदी र रिब्दीकोट गाउँपालिका-६, ठिमुरे धुस्तुङकी ५९ वर्षीया कृष्णकुमारी सारुको पहिरोमा पुरिएर मृत्यु भएको हो। प्रहरीले दुवै जनाको शव निकालेर पोष्टमार्टमका लागि जिल्ला अस्पताल पाल्पामा राखिएको जनाएको छ।

यसैगरी, माथागढी गाउँपालिका-३ कसेनी भैसीकट्टामा पहिरोले लिलबहादुर घर्तिमगरको घर पुर्दा तीन जना बेपत्ता भएका छन्। पहिरोमा घर्तीको परिवारका दुई जना र छिमेकीकी एक छोरी हराइरहेका छन्।

प्रहरी नायब उपरीक्षक भट्टराईले बेपत्ता भएकाहरूबारे जानकारी दिँदै उनीहरूको खोजी कार्य निरन्तर जारी रहेको बताएका छन्।