काठमाडौं । दक्षिण अफ्रिकाका दुई वटा टाउनसिपहरूमा भएका दुई छुट्टाछुट्टै गोलाबारीका घटनामा परी कम्तीमा २७ जनाको मृत्यु भएको छ भने २० भन्दा बढी घाइते भएका छन्।

पहिलो घटना शनिवार ढिलो गरी जोहानेसबर्गको दक्षिण-पश्चिममा रहेको वेडेलास्थित एउटा बार (ताभेर्न) मा भएको थियो, जहाँ कम्तीमा १७ जनाको ज्यान गएको थियो भने १५ जना घाइते भएका थिए।

प्रहरीका अनुसार उनीहरू एके-४७ राइफल र पेस्तोल बोकेका आठ जना शङ्कास्पद व्यक्तिहरूको खोजी गरिरहेका छन्। गोलाबारीको कारण अझै खुल्न सकेको छैन र हालसम्म कसैलाई पनि पक्राउ गरिएको छैन।

यसैगरी, आइतबार बिहानै केप टाउन नजिकैको ल्वान्द्ले स्थित एउटा पसलमा बन्दुकधारीहरूले अन्धाधुन्ध गोली चलाउँदा कम्तीमा १० जनाको मृत्यु हुनुका साथै ११ जना घाइते भएका छन्।

डर्बन शहर नजिकै एउटा पारिवारिक पार्टी (हाउस पार्टी) मा एक गर्भवती महिलासहित ११ जनाको ज्यान जाने गरी भएको गोलाबारीको केही दिनपछि नै यी घटनाहरू भएका हुन्।

पहिलो घटनाबारे जानकारी दिँदै प्रहरीले शनिवार राति करिब ९:३० बजे गौतेङ प्रान्तको वेस्ट र्यान्ड जिल्लास्थित वेडेला एक्सटेन्सन ३ मा आक्रमण सुरु भएको जनाएको छ।

बन्दुकधारीहरूले पहिले बारबाहिर जम्मा भएका मानिसहरूमाथि गोली चलाएका थिए र त्यसपछि भित्र छिरेर थप गोलाबारी गरेका थिए। अनुसन्धानकर्ताहरूका अनुसार आक्रमणका क्रममा केही ग्राहकहरूलाई तलासी लिएर उनीहरूका मोबाइल फोनहरू खोसिएको थियो।

त्यसपछि शङ्कास्पद व्यक्तिहरू दुई वटा सवारी साधनमा भाग्न सफल भएका थिए। घटनाका क्रममा अन्य दुई वटा सवारी साधनहरू जलाइएका छन्।

कप्तान टिन्टस्वालो सिबेकोका अनुसार आठ जना शङ्कास्पद व्यक्तिहरूको पहिचान र खोजीका लागि जासूस तथा विशेषज्ञ प्रहरी टोलीहरू खटाइएको छ। प्रहरीले १७ वटा हत्या, १५ वटा ज्यान मार्ने उद्योग र दुई वटा सम्पत्ति क्षति गर्नेसम्बन्धी मुद्दा दर्ता गरेको छ।

दोस्रो घटनामा प्रहरीले आइतबार मध्यरातिपछि भएको गोलाबारीमा संलग्न धेरै जना शङ्कास्पद व्यक्तिहरूको खोजी भइरहेको जनाएको छ।

दक्षिण अफ्रिकामा हातहतियार प्रयोग गरी गरिने हत्यासहितका हिंसात्मक अपराधका घटनाहरू उच्च दरमा हुने गरेका छन्।

विशेष गरी प्रमुख शहरी क्षेत्रहरूमा सार्वजनिक सुरक्षा सुधार गर्न र बन्दुक अपराधविरुद्ध थप अपरेसनहरू सञ्चालन गर्न सरकारमाथि निरन्तर दबाब पर्दै आएको छ।