काठमाडौं। काठमाडौं उपत्यकामा पछिल्लो २४ घण्टामा ट्राफिक नियम उल्लंघन गर्ने २२८ जना सवारीसाधनका चालकलाई ट्राफिक प्रहरीले कारबाही गरेको छ।

काठमाडौं उपत्यकाका विभिन्न स्थानमा सोमबार बिहानसम्म सञ्चालन गरिएको विशेष चेकिङका क्रममा उनीहरू कारबाहीमा परेका हुन्।

कारबाहीमा पर्नेहरूमा सबैभन्दा बढी मादक पदार्थ सेवन (मापसे) गरी सवारीसाधन चलाउने ८४ जना रहेका छन्। त्यस्तै सिसीटिभीमार्फत निगरानी गरी ३९ जना र रातो बत्तीको उल्लंघन गर्ने ६ जना चालकलाई नियन्त्रणमा लिई कारबाही गरिएको ट्राफिक प्रहरीले जनाएको छ।

यसैगरी, हर्न निषेधित क्षेत्रमा हर्न बजाउने १ जना, सवारीको यान्त्रिक अवस्था ठिक नभएको १ जना, एकतर्फी सडकमा सवारी हाँक्ने २ जना र अन्य विभिन्न ट्राफिक नियम उल्लंघन गर्ने ७५ जना चालकलाई कारबाही गरिएको छ।