सुनसरी। सुनसरीको बराहक्षेत्र नगरपालिका–५ स्थित अमाहा सामुदायिक वनमा लुकाइराखेको अवस्थामा प्रहरीले एक थान कटुवा पेस्तोल र एक थान गोली बरामद गरेको छ।

प्रहरीका अनुसार सामुदायिक वनभित्र पिठारीको रुखको फेदमा झ्यासले छोपेर राखिएको अवस्थामा हतियार र गोली फेला परेको हो। बरामद गोली कटुवा पेस्तोलसँगै थ्रिनटथ्री राइफलमा समेत प्रयोग हुने खालको रहेको प्रहरीले जनाएको छ।

सामुदायिक वनभित्र हातहतियार लुकाएर राखिएको सूचना प्राप्त भएपछि जिल्ला प्रहरी कार्यालय, इलाका प्रहरी कार्यालय महेन्द्रनगर र भरौल प्रहरी चौकीबाट संयुक्त प्रहरी टोली खटिएको थियो।

प्रहरीले शनिबार साँझ ५ बजे पेस्तोल र गोली बरामद गरेको हो। उक्त हतियार र गोली कसले तथा कुन उद्देश्यले लुकाएर राखेको थियो भन्ने विषयमा थप अनुसन्धान भइरहेको प्रहरीले जनाएको छ।