धनगढी । नेपाली कांग्रेसका पूर्वकेन्द्रीय सदस्य गोरखबहादुर बिष्ट (आनन्द)ले निर्वाचनको नतिजा वा पदमा रहनु र नरहनुले जनताप्रतिको सेवाभावलाई कुनै असर नपार्ने बताएका छन्। निर्वाचनमा प्राप्त हुने जित वा हार प्राविधिक विषय मात्र भएको उल्लेख गर्दै उनले आफू सधैँ जनताको सुख-दुःखमा साथै रहने प्रतिबद्धता जनाएका छन्।

कैलाली क्षेत्र नम्बर ४ अन्तर्गत पर्ने नेपाली कांग्रेस चुरे गाउँपालिका, गोदावरी नगरपालिका र गौरीगंगा नगरपालिकाले बडादसैँ तथा दीपावलीको अवसरमा आयोजना गरेको छुट्टाछुट्टै शुभकामना आदानप्रदान कार्यक्रममा बोल्दै विशिष्ट अतिथि बिष्टले सो कुरा बताएका हुन्। गत प्रतिनिधि सभा निर्वाचनमा कैलाली क्षेत्र नम्बर ४ बाट प्रतिस्पर्धा गरी उपविजेता बनेका बिष्ट यतिबेला स्थानीय तहमा जनताको घरदैलोमा निरन्तर सक्रिय रहँदै आएका छन्।

कार्यक्रमलाई सम्बोधन गर्दै नेता बिष्टले जनतासँगको सम्बन्ध र जिम्मेवारी निर्वाचनको गणितीय हिसाबकिताबमा मात्र सीमित नरहने स्पष्ट पारे। नागरिकको अपेक्षा अनुसार निरन्तर क्रियाशील रहनु आफ्नो प्रमुख दायित्व भएको उल्लेख गर्दै उनले संगठनलाई चुस्त र दुरुस्त गतिमा अगाडि बढाउन नेता-कार्यकर्ताहरूलाई निर्देशन दिएका छन्।

भेटघाटका क्रममा उनले फागुन २१ को निर्वाचन र क्षेत्रीय निर्वाचनदेखि नै कैलाली क्षेत्र नम्बर ४ कांग्रेस एकतावद्ध र व्यवस्थित भएकोमा खुसी व्यक्त गरे। कांग्रेसको गुमेको साखलाई सशक्त रूपमा पुनःस्थापित गर्न यस्ता भेटघाट र गतिविधिले ठूलो ऊर्जा थपेको बताउँदै उनले आगामी दिनमा पनि यस्ता कार्यक्रमलाई निरन्तरता दिन सुझाव दिए। साथै, पार्टीको साख जोगाउन नेता-कार्यकर्तामा गाम्भीर्यता हुनुपर्ने र संगठनलाई सुदृढ बनाउन वडास्तरमै नेताहरू खटिनुपर्नेमा उनले जोड दिए।

आगामी निर्वाचनमा उम्मेदवार चयन गर्दा स्थानीय नेता-कार्यकर्ताको चाहना र भावना अनुसार जनतामा भिजेको व्यक्तिलाई टिकट दिनुपर्ने धारणा समेत उनले राखे। जनताको माझमा लोकप्रिय र भिजेको व्यक्तिले टिकट पाउँदा विजय सहज हुने र त्यसले जनताको पक्षमा काम गर्न मद्दत पुग्ने भएकाले सबैलाई आ-आफ्नो ठाउँबाट सक्रिय रहन उनको आग्रह छ।

सामान्यतया निर्वाचन जितेपछि जनप्रतिनिधिहरू गाउँ-घरमा नफर्कने गुनासो व्याप्त रहेका बेला चुनावमा पराजित भएर पनि नेता बिष्ट जनताका सुख-दुःख सुन्न घरदैलोमा पुगेपछि स्थानीय बासिन्दा हर्षित बनेका छन्। आपतविपत र अप्ठ्यारो परिस्थितिमा जनताको साथमा उभिने उनको सक्रियताले स्थानीय स्तरमा ठूलो आशा र भरोसा जगाएको स्थानीयको भनाइ छ।

चुरे गाउँपालिकाका सभापति खगेन्द्र खडायत, गौरीगंगा नगरसभापति हृदय थापा काजी र गोदावरी नगरसभापति रविन्द्र शाही ‘गुड्डु’को सभापतित्वमा छुट्टाछुट्टै कार्यक्रम सम्पन्न भएका थिए। कार्यक्रममा विशेष अतिथिका रूपमा क्षेत्रीय सभापति सुरत कार्की, पूर्व राष्ट्रिय सभा सदस्य हिरादत्त भट्ट र पूर्व क्षेत्रीय सभापति बसन्त रोकाया ‘ललित’ लगायतले आफ्ना धारणा राखेका थिए। उक्त शुभकामना आदानप्रदान कार्यक्रममा महाधिवेशन प्रतिनिधि, क्षेत्रीय कार्यसमिति, नगर कार्यसमिति तथा वडा कार्यसमितिका पदाधिकारीहरूको बाक्लो उपस्थिति रहेको थियो।