काठमाडौं। शुक्रबार बिहान इराकको बगदाद अन्तर्राष्ट्रिय विमानस्थलमा ड्रोन आक्रमणमा इरानका शक्तिशाली सैन्य कमाण्डर मेजर जनरल कासिम सुलेमानीलाई मार्न अमेरिकी राष्ट्रपति डोनाल्ड ट्रम्पले आदेश दिएको अमेरिकी अधिकारीहरुले पुष्टि गरेका छन् । जनरल सुलेमानीको मृत्यु भएको इरानको आधिकारिक मिडियाले पुष्टि गरेका छन् ।

‘जनरल सुलेमानीले सक्रिय रुपमा इराक र यस क्षेत्रमा अमेरिकी कुटनीतिज्ञ र अन्यको हत्या गर्ने योजना बनाइरहेका थिए’ अमेरिकी रक्षा मन्त्रालय पेन्टागनको एक वक्तव्यलाई उद्धृत गर्दै अमेरिकी मिडिया न्यूयोर्क टाइम्सले लेखेको छ ‘जनरल सुलेमानी र उनको फोर्स सयौं अमेरिकीहरुको हत्या र हजारौंलाई घाइते बनाउन जिम्मेवार छन् ।’

‘यो आक्रमण भविष्यमा हुन सक्ने इरानी आक्रमण योजनालाई निरुत्साहित गर्न लक्षित छ’ पेन्टागनको वक्तव्यमा अगाडि लेखिएको छ ‘अमेरिकाले विश्वभर आफ्ना नागगरिक र आफ्नो उद्देश्यको रक्षा गर्न आवश्यक सबै किसिमका कदमहरु उठाउने कामलाई निरन्तर जारी राख्नेछ ।’ यो आक्रमणपछि यसअघिदेखि नै तनावग्रस्त रहँदै आएको इरान र अमेरिकाको सम्बन्ध अझै बिग्रिने अनुमान गरिएको छ ।

यो आक्रमणअघि बिहीबार अमेरिकी रक्षा सचिव मार्क टी एस्परले इरानी फोर्सले इराक र सिरियामा अमेरिकी बेस वा व्यक्तिहरुमाथि थप आक्रमणको योजना बनाएको पाइएमा अमेरिकी सेनाले इरानी फोर्समाथि आक्रमण गर्ने चेतावनी दिएका थिए । एस्परले भनेका थिए ‘हामीले आक्रमणको संकेत पाएमा अमेरिकी सेना र अमेरिकी नागरिकको रक्षा गर्न प्रतिआक्रमण गर्नेछौं ।’ इरानमा सरकारी टेलिभिजनले जनरल सुलेमानीको मृत्युको समाचार दिन नियमित कार्यक्रम नै रोकेको थियो ।