काठमाडौं। भारतीय सेनामा सेवा गरेर अवकाश पाएका नेपाली भूपू गोर्खा सैनिकले भारतीय सेनाका चीफ अफ आर्मी स्टाफ मनोज मुकुन्द नरवणेलाई पत्र लेख्दै कोरोनाभाइरसविरुद्ध भ्याक्सिनको माग गरेका छन् । उनीहरुले पत्रमा आफूहरु र आफूहरुमा निर्भर परिवारका सदस्यहरुको लागि भ्याक्सिन माग गरेका हुन् ।

यो महिनाको सुरुवातमा पठाइएको पत्र सेना प्रमुख नरवणे र अवकाशप्राप्त सैनिकको केन्द्रीय संगठन एक्स सर्भिसमेन कन्ट्रिब्युटरी हेल्थ स्कीमलाई लेखिएको छ । पत्रमा अवकाश प्राप्त नेपाली गोर्खा सैनिकहरुले आफूहरुमध्ये १५० जनाको भ्याक्सिन नपाएर मृत्यु भएको उल्लेख गरेका छन् । भारतीय अखबार द प्रिन्टले प्राप्त गरेको पत्रमा नेपालमा यो महामारीले अझै धेरैको ज्यान लिन सक्ने उल्लेख गरिएको छ ।

पत्रमा भूपू सैनिकहरुले नेपाल सरकार आफैंमा भ्याक्सिनको लागि अरु देशमा निर्भर भएकोले यहाँको सरकारले आफूहरु र आफ्ना निर्भर परिवारलाई भ्याक्सिनको लागि प्राथमिकतामा राख्न सक्ने अवस्था नभएको बताएका छन् । ‘पूर्व सैनिकहरुले भारतीय सेनाका लागि पूरै वफादारिताका साथ सेवा गरे तर अहिले उनीहरु मरिरहेका छन्’ पत्रमा भनिएको छ । उनीहरुले नेपाल सरकार र भारत सरकार दुवैले आफूहरुलाई भ्याक्सिनको लागि प्राथमिकतामा नराखेको बताएका छन् ।

एक्स सर्भिसमेन कन्ट्रिब्युटरी हेल्थ स्कीमले भारतीय पूर्व सैनिक र उनीहरुका निर्भर परिवारलाई भ्याक्सिन दिइरहेको तर नेपालका पूर्व सैनिक भने पहिलो डोजबाटै बञ्चित रहेको बताउँदै पत्रमा पूर्व सैनिकहरुले यो विश्वप्रसिद्ध गोर्खा सैनिकहरुप्रति ठूलो भेदभाव भएको बताएका छन् । उनीहरुले आफूहरु र आफ्ना परिवारलाई भ्याक्सिन उपलब्ध गराउनु एक्स सर्भिसमेन कन्ट्रिब्युटरी हेल्थ स्कीमको दायित्व भएको बताएका छन् । उनीहरुले एक्स सर्भिसमेन कन्ट्रिब्युटरी हेल्थ स्कीमलाई सेनाप्रमुख नरवणेले यस विषयमा निर्देशन दिनुपर्ने माग गरेका छन् ।