सडकमा खसेको पहिरो पन्छाएपछि खुल्यो यातायात – Dcnepal

सडकमा खसेको पहिरो पन्छाएपछि खुल्यो यातायात

खोटाङ । खोटाङ-काठमाडौं आउजाउ गर्ने राजमार्गका विभिन्न खण्डमा खसेको पहिरो पन्छाएपछि यातायात सेवा सूचारु भएको छ ।

३१ असोजदेखि २ कात्तिकसम्म परेको वर्षाका कारण राजमार्गका विभिन्न खण्डमा खसेको पहिरो पन्छाएपछि दिक्तेल–काठमाडौं यातायात निर्वाध सूचारु भएको हो । पहिरो पन्छाइएपछि काठमाडौंबाट ओखलढुंगा र सोलुखुम्बु आवतजावत गर्ने सवारी साधनसमेत निर्वाध गुड्न थालेका छन् । सडकमा थुप्रिएको पहिरो पन्छाएर सवारीसाधन वारपार गर्ने वातावरण बनाइए पनि सडकलाई पूर्णरुपमा ‘क्लियर’ गर्न बाँकी रहेको खोटाङ यातायात प्रालिका महासचिव रामकुमार हिङमाङले बताए ।

वर्षाका कारण खोटाङको हलेसी तुवाचुङ नगरपालिका–१ बाहुनीडाँडाको कदुवा, सिन्धुलीको नागथान, कालीआँप, हैवारलगायतका स्थानमा पहिरो खस्दा सडक अवरुद्ध बनेको थियो । खुर्कोट नजिक पर्ने हैवारमा विशाल पहिरो खस्दा २-३ कात्तिकको साँझसम्म यात्रु तथा मालबाहक सवारी साधन रोकिँदा हजारौं यात्रु सडकमै अलपत्र परेका थिए । हैवारमा पहिरो खस्दा खोटाङसहित ओखलढुंगा र सोलुखुम्बुका यात्रु थुनिएका थिए । हैवारमा पटक–पटक पहिरो खस्ने गरेको छ ।

हैवारमा गएको पहिरोले दुई दिनसम्म बाटो थुनेपछि कतिपय यात्रु तथा मालबाहक सवारी साधन सिन्धुली–उदयपुरको कटारी–घुर्मी हुँदै ओहोर–दोहोर गरेका थिए । घुमाउरो बाटो प्रयोग गर्दा कम्तिमा १२० किलोमिटर घुम्नु परेको यातायात व्यवसायीले बताएका छन् । कदुवामा ३ कात्तिकमा पन्छाइएको पहिरो पुनः खसेपछि ४ कात्तिक विहान पन्छाएर सडक सूचारु गराइएको हो ।

साँघुरो सडक भएको तथा छोटो दुरीमा घुम्ती भएका कारण वर्षा याममा बढिमात्रामा सडकमा पहिरो खस्ने गरेको महासचिव हिङमाङले बताए । ‘पहिरो खसेको ठाउँमा ट्रयाक खोलियो तर अझै पनि जोखिम छ । सडक पूर्णरुपमा क्लियर गरिएको छैन,’ महासचिव हिङमाङले भने, ‘सडक चौडा नहुनु र नजिक–नजिक टर्निङ भएका कारण पहिरोले बढि क्षति पुर्‍याएको हो । छोटो टर्निङमा माथिबाट पहिरो खस्दा तल्लो टर्निङ पनि बिगारेको देखिन्छ ।’

Facebook Comment


सम्बन्धित खवर

ताजा भिडियो