काठमाडौं। भारतको स्थल सेनाका प्रमुख रहेका मनोज मुकुन्द नरवणे भारतको नयाँ चीफ अफ डिफेन्स स्टाफ नियुक्त भएका छन् । यसको घोषणा केही बेरमा गरिँदैछ । नरवणे पदोन्नती भएसँगै उनको रिक्त हुने स्थानमा लेफ्टिनेन्ट जनरल चण्डी प्रसाद मोहांटीलाई नयाँ स्थल सेना प्रमुख बनाइएको छ ।

भारतका प्रथम चीफ अफ डिफेन्स स्टाफ जनरल बिपिन रावतको बुधबार हेलिकप्टर दुर्घटनामा निधन भएपछि भारतीय सेनाको सर्वोच्च पद खाली थियो । बुधबार रावतको निधन भएपछि अर्को सीडीएस नियुक्त नहुँदासम्मको लागि सीडीएस हेडक्वार्टरमा रावतपछि दोस्रो बरियतामा रहेका एयर मार्शल बलभद्र राधाकृष्णले कार्यवाहक सीडीएसको जिम्मेवारी सम्हालिरहेका थिए ।

हालसम्म भारतीय सेनाका २७ औं चीफ अफ आर्मी स्टाफ रहेका मनोज मुकुन्द नरवणे अब दोस्रो चीफ अफ डिफेन्स स्टाफ भएका छन् । भारतको पुणेमा जन्मिएका ६१ वर्षीय नरवणे सातौं शिख लाइट इन्फेन्ट्री युनिटका हुन् । उनका पिता पनि भारतीय वायु सेनाका अधिकारी थिए । नरवणेलाई नेपाली सेनाको मानार्थ महारथीको दर्जा समेत दिइएको छ ।

नयाँ चीफ अफ आर्मी स्टाफ बनेका लेफ्टिनेन्ट जनरल चण्डी प्रसाद मोहांटी यसअघि स्थल सेनामा नरवणेपछि दोस्रो बरियतामा थिए । १९८२ मा सैन्य सेवामा प्रवेश गरेका मोहांटी राजपुत रेजिमेन्टका हुन् । ओडिसाको जगतसिंहपुर जिल्लाका मोहांटी ओडिसा राज्यबाट सेनाको यो पदमा पुग्ने पहिलो सैनिक अधिकारी हुन् ।