काठमाडौं । आईपीएलको अर्को पाँच सिजन अर्थात २०२३ देखि २०२७ सम्मका लागि प्रसारण अधिकार लिलामी भएको छ । बीसीसीआइले आईपीएलको विभिन्न श्रेणीमा टिभी र डिजिटल प्रसारण अधिकार राखेको थियो, जुन लिलामीको दोस्रो दिन ४४ हजार ७५ करोड भन्दा बढीमा बिक्री भएको थियो।

टेलिभिजन र डिजिटल प्रसारणको अधिकार विभिन्न कम्पनीलाई दिइएको बताइएको छ । पहिलो श्रेणी भारतमा टिभी प्रसारण अधिकारको थियो। समाचार एजेन्सी पीटीआईका अनुसार ‘डिज्नी स्टार’ले यसका लागि २३,५७५ करोडको बोली लगाएको थियो।

दोस्रो श्रेणी ओटीटी प्लेटफर्ममा आईपीएलको प्रसारण अधिकार थियो। पीटीआईका अनुसार रिलायन्सको कम्पनी ‘भियाकम १८’ ले यसका लागि २०,५०० करोडको बोली लगाएको थियो।

टिभीमा आईपीएल खेल प्रसारण गर्ने च्यानलले बीसीसीआईलाई प्रत्येक खेलको लागि ५७.५ करोड रुपैयाँ दिनेछ। साथै, डिजिटल प्लेटफर्ममा आईपीएल खेलहरू प्रसारण गर्ने कम्पनीले प्रत्येक खेलको लागि बीसीसीआईलाई ५० करोड रुपैयाँ दिनेछ।

यसपटक प्रसारण अधिकारका लागि चार विधामा बोलपत्र गरिएको छ । लिलामीमा हालसम्म दुई विधामा प्रसारण अधिकार दिइएको छ भने तेस्रो र चौथो विधाको लिलामी जारी छ ।

आईपीएल प्रसारणको टिभी र डिजिटल अधिकार छुट्टाछुट्टै दिइएको यो पहिलो पटक हो। विगत पाँच वर्षदेखि, डिज्नी स्टारसँग सबै प्लेटफर्महरूमा आईपीएल प्रसारण गर्ने विश्वव्यापी अधिकार थियो।