काठमाडौं । पूर्वी अफ्रिकी देश माडागास्करमा एक आपराधिक समूहले घरहरूमा आगजनी गर्दा कम्तीमा ३२ जनाको ज्यान गएको छ । यसपछि सेनाले अपराधीहरुको खोजीमा हेलिकप्टर तैनाथ गरेको छ ।

प्रहरीका अनुसार अपराधीहरूले मानिसहरूलाई तीनवटा झुपडीमा जबरजस्ती थुनेर ती झुपडीमा आगो लगाएका थिए। यो घटना माडागास्करको राजधानी अन्टानानारिभोको उत्तरमा रहेको अन्काजोबे जिल्लाको एम्बोलोटेरेकेली गाउँमा भएको हो। मृत्यु हुनेमा महिला र बालबालिका पनि रहेका छन् ।

माडागास्करका रक्षामन्त्री जनरल लियोन जीन-रिचर्ड राकोटोनिरिनाले घटनालाई गाईवस्तु चोरीका कारण भएको बताएका छन्, जसलाई त्यहाँ ‘दहालोस’ भनिन्छ।

अधिकारीलाई जानकारी गराएको भन्दै गाउँलेलाई निशाना बनाइएको हुनसक्ने उनको आशंका छ । उनले दोषी पत्ता लगाई कानुनी कठघरामा ल्याउने कुरा गरेका छन् ।

पछिल्ला केही वर्षहरूमा, माडागास्करमा गाईवस्तु चोरहरू र तिनीहरूलाई रोक्ने प्रयासहरूका कारण धेरै हिंसात्मक घटनाहरू भएका छन्।

घटनास्थलबाट बाहिरिएको भिडियो फुटेजले घरको सानो पर्खाल बाहेक घरमा केही नरहेको देखाएको छ ।