काठमाडौं । हम्बनटोटा बन्दरगाहमा चीनको ‘विशेष जहाज’ लाई स्वीकृति दिने सम्बन्धमा श्रीलंकाबाट आधिकारिक जवाफ आएको छ। श्रीलंकाबाट चिनियाँ जहाज हम्बनटोटामा इन्धन भर्न र आपूर्ति पुनःस्थापना गर्न मात्रै आएको बताइएको छ । भारतले आधिकारिक रूपमा श्रीलंकासँग आपत्ति जनाएको थियो।

चीनको ‘युआन वाङ ५’ जहाज स्याटेलाइट र मिसाइल ट्र्याकिङ सिस्टमले सुसज्जित छ र यसले खोज तथा अनुसन्धानको काममा निपुणता हासिल गरेको छ । एएफपी समाचार एजेन्सीका अनुसार श्रीलंका सरकारका प्रवक्ता बन्दुला गुणवर्द्धनाले सोमबार मन्त्रिपरिषद्ले जहाजको भ्रमणबारे छलफल गरेको बताए। श्रीलंकाले यो जहाजलाई रोक्ने छैन।

गुणवर्द्धनाले भने, “यो गम्भीर आर्थिक संकटमा भारत र चीन दुवैले हामीलाई सहयोग गरिरहेका छन्। राष्ट्रपति रनिल विक्रमासिङ्घेले सबै पक्षसँग वार्ता गरेर कूटनीतिक समाधान खोजिने मन्त्रिपरिषद्लाई जानकारी दिएका छन्।” उनले भने कि चिनियाँ जहाजले एक सातासम्म इन्धन भर्ने र आपूर्ति पुनर्स्थापना बाहेक अरू केही गर्ने छैन।

भारतको दक्षिणी राज्यहरूबाट हम्बनटोटा बन्दरगाहको दूरी केही किलोमिटर मात्र छ। भारतको चिन्ता यो चिनियाँ जहाजबाट दक्षिण भारतीय राज्यहरूमा परमाणु अनुसन्धान केन्द्र र बन्दरगाहहरू सजिलै निगरानी गर्न सकिन्छ। श्रीलंकाले यस जहाजको आगमनलाई सामान्य गतिविधिको रूपमा वर्णन गरेको छ।