काठमाडौं । शिक्षा, विज्ञान तथा प्रविधिमन्त्री देवेन्द्र पौडेलले विभिन्न विद्यार्थी सङ्गठनले तालाबन्दी गरेर विश्वविद्यालयका समस्या समाधान नहुने बताएका छन् । पद्यकन्या क्याम्पसको ७२औँ वार्षिकत्सव समारोह २०७९ को अवसरमा आज क्याम्पस परिसरमा आयोजित कार्यक्रमलाई सम्बोधन गर्दै उनले वार्ता, छलफल र संवादबाट समस्याको अन्त्य गर्न सकिने बताए ।

दिनहुँजसो विभिन्न विद्यार्थी सङ्गठनले विश्वविद्यालयमा तालाबन्दी गरेको उल्लेख गर्दै नेकपा(माओवादी केन्द्र)का सचिवसमेत रहेका पौडेलले भने, “नेपाली संस्कारअनुसार शिक्षण संस्था र मन्दिर पवित्र संस्था मानिन्छन् ।” तालाबन्दीले विश्वविद्यालयको विकास नहुने भन्दै उनले भने, “कृपया तालाबन्दी संस्कारको अन्त्य गरौँं । तालाबन्दीले विश्वविद्यालय बन्दैन ।” सहमतिबाटै देशका ठूला–ठूला काम भएका बताउँदै मन्त्री पौडेलले सधैँका लागि तालाबन्दी नगर्ने बाटो अपनाउन सम्बन्धित सबैलाई आग्रह गरे । पवित्र स्थानलाई तालाबन्दी गरेमा राम्रो नहुने समेत उहाँले तर्क गरे । विश्वविद्यालयका पदाधिकारी, कर्मचारीहरुको समस्याको समाधान वार्ता, छलफल र संवादद्वारा हल गर्नुपर्नेमा उनले जोड दिए ।

मन्त्री पौडेलले महिलाहरूको मुलतः अध्ययनअध्यापन गराउने छुट्टै विश्वविद्यालयको रुपमा अघि बढाउन राखेकोे पद्यकन्या क्याम्पसको प्रस्ताव आफूले पनि अघि बढाउने विश्वास व्यक्त गरे । “चीनमा पाँच लाख जनता बराबर एउटा विश्वविद्यालय छ, भारतमा १४ लाख जनता बराबर एउटा विश्वविद्यालय छ ।” उनले भने, “नेपालमा झण्डै २० लाख बराबर एउटा विश्वविद्यालय छ र पनि कतिपयले नेपालमा विश्वविद्यालय धेरै भए कि भनेर आलोचना पनि गर्छन् ।” उनले विश्वविद्यालय बढी नभएको समेत स्पष्ट पारे ।

विश्वविद्यालयहरू विशिष्टिकृत गरिने उनको भनाइ थियो । सम्बन्धित निकायले उठाएका विषय समेटेर लामो छलफलपछि भर्खरै सदनबाट दुईवटा विश्वविद्यालयको ऐन पास गरेको उनले सुनाए । “करार कर्मचारी, तालाबन्दीजस्ता सम्पूर्ण समस्या हल गर्ने गरी ऐन निर्माण गरेका छौँ”, पौडेलले भने ।

सङ्घीय शिक्षा ऐन मन्त्रिपरिषद्मा पुगेको र त्यसका लागि शिक्षा मन्त्रालयले मात्र नहुने भन्दै उनले कानुन र अर्थ मन्त्रालयको पनि सहयोग चाहिने बताए । लामो समयदेखि प्राध्यापन गर्दै आउनुभएका विशिष्ट व्यक्तित्वहरूलाई विश्वविद्यालयबाट सम्मान गर्ने र सम्पूर्ण विश्वविद्यालयमा क्षमता र योग्यताको आधारमा प्रतिस्पर्धाबाट आउने प्रणाली अपनाएको समेत उनले स्पष्ट पारे ।

उनले विश्वविद्यालयमा पहुँचको भरमा नियुक्ति हुनु राम्रो होइन भन्दै विश्वविद्यालयमा आफ्नो क्षमता र योग्यता प्रस्तुत गरेर प्रतिस्पर्धाबाटै, सक्षम व्यक्ति आउने कुरा स्थापित गर्नु आजको आवश्यकता औँल्याए ।

वार्षिकोत्सव समारोहमा बागमती प्रदेशका संस्कृति तथा पर्यटनमन्त्री देवेन्द्र श्रेष्ठ, त्रिवि निमित्त शिक्षाध्याक्ष प्रा डा भार्गव धिताल, त्रिवि व्यवस्थापन सङ्काय डिन प्रा डा डिल्लीराज शर्मा, त्रिवि मानविकी तथा सामाजिकशास्त्र सङ्कायका डिन प्रा डा कुसुम शाक्य, पद्यकन्या क्याम्पसका निमित्त क्याम्पस प्रमुख उपप्रध्यापक राजु मल्ललगायतले शुभकामना दिए।

मन्त्री पौडेलले पद्यकन्या बुलेटिन, संस्कृति विभागले तयार पारेको भ्वाइस अफ कल्चर, जर्नल र अङ्ग्रेजी विभागले तयार पारेको माइण्डस स्केप्ट जर्नल पुस्तकहरुको लोकार्पणसमेत गरेका थिए । यसैगरी कार्यक्रममा विशिष्ट व्यत्तित्वहरूलाई पुरस्कार तथा सम्मान गरिएको थियो । कार्यक्रमको सञ्चालन उपप्राध्यापक ज्ञाननिष्ठ ज्ञवाली र दीपा दाहालले गरेका थिए ।