काठमाडौं। नेपाली सेनाका सेनापति आशोकराज सिग्देलले आन्दोलनरत जेन जी समूहलाई वार्ताका लागि आह्वान गरेका छन्। उनले आज साँझ एक छोटो भिडियो सन्देश जारी गर्दै वार्ताको आह्वान गरेका हुन्। तर, उनले त्यस्तो वार्ता आन्दोलनरत पक्षले को संग गर्ने भन्ने चाहिँ भनेका छैनन्। उनले भनेका छन्, ‘यस विषम परिस्थितिबाट राष्ट्रलाई शान्तिपूर्ण तवरले निकास दिनका लागि आन्दोलनरत समूहलाई आन्दोलनका कार्यक्रमहरु स्थगन गरी वार्ताका लागि आह्वान गर्दछौं।’

आझ अपरान्हतिर काठमाडौंका मेयर बालेन साहले एक फेसबुक पोष्ट गर्दै वार्ता सेनासँग हुने बताएका थिए तर यसका लागि उनले संसद विघटन हुनुपर्ने सर्त राखेका थिए। के नेपाली सेनाका सेनापतिले बालेन साहकै मागको जवाफ दिएको हो ? यदि आन्दोलनरत पक्ष जेनजीका नेतृत्वकर्ता भनेर चिनिएका युवाहरु वार्ता गर्न तयार भए भने उनीहरुले कामचलाउ सरकारसँग वार्ता गर्नु पर्ने हो कि ? वा सिधै नेपाली सेनासँग हो भन्ने स्पष्ट भएको छैन। सेना राजनीतिक वार्ता गर्ने अंग होइन तर मुलुक ज्यादै विषम परिस्थितिमा रहेकाले राजनीतिक वार्ताको आह्वान गर्नु जस्तो देखिएको छ।

नेपालको स्वतन्त्रता, भौगोलिक अखण्डता, स्वाधिनता र राष्ट्रिय एकता र नेपाली जनताको सुरक्षाका लागि नेपाली सेना प्रतिबद्ध रहेको बताउंदै सेनापति सिग्देलले आन्दोलनले जनधनको अपूरणीय क्षति भएको हुंदा थप क्षति हुन नदिन राष्टिय एकता कायम गर्नु सबैको दायित्व भएको स्मरण पनि गराएका छन्।