काठमाडौं। युवा पुस्ताको ऊर्जा, सिर्जनशीलता र साहसिक प्रतिभालाई एकै थलोमा प्रस्तुत गर्ने उद्देश्यका साथ आयोजित ‘पल्सर आरपीएम टेकओभर टोखा’ कार्यक्रम सफलतापूर्वक सम्पन्न भएको छ।

पल्सर आरपीएमले गत जेठ १६ गते टोखास्थित ‘स्केटर्स नेपाल’ मा आयोजना गरेको यस विशेष कार्यक्रममा विभिन्न विधाका उदीयमान तथा भूमिगत कलाकार एवं खेलाडीहरूको उल्लेखनीय सहभागिता रहेको थियो।

सहरी युवा संस्कृति र साहसिक खेललाई केन्द्रित गरी तयार पारिएको यस कार्यक्रममा बी-बोइङ (ब्रेक डान्स), स्केटबोर्डिङ, बीएमएक्स प्रदर्शन तथा र्‍याप ब्याटलजस्ता विविध आकर्षक प्रस्तुतिहरू समावेश गरिएका थिए।

यी गतिविधिहरूमार्फत युवा प्रतिभाहरूले आफ्नो अनुपम कला, क्षमता र उत्साह प्रदर्शन गर्ने अवसर पाएका थिए भने उपस्थित दर्शकहरूले पनि ताली र हुटिङसहित प्रत्येक प्रस्तुतिको भरपुर मनोरञ्जन लिएका थिए। कार्यक्रमको मुख्य आकर्षणका रूपमा रहेका चर्चित स्टन्ट राइडर रबिन श्रेष्ठले पल्सर एनएस २०० मोटरसाइकलमा सवार हुँदै रोमाञ्चक स्टन्टहरू प्रदर्शन गरेका थिए।

उनको साहसिक प्रस्तुति, अद्भुत गति, कौशल र उत्कृष्ट नियन्त्रण क्षमताले मैदानमा उपस्थित सम्पूर्ण दर्शकहरूलाई मन्त्रमुग्ध बनाएको थियो। स्टन्ट प्रदर्शनका क्रममा देखाइएको सन्तुलनले कार्यक्रमको रोमाञ्च र आकर्षणलाई थप उचाइमा पुर्‍याएको थियो।

आयोजकका अनुसार पल्सर आरपीएम टेकओभर केवल एउटा मनोरञ्जनात्मक कार्यक्रम मात्र नभई गति, सीप, सिर्जनशीलता र आत्मविश्वासको साझा उत्सव हो।

पल्सर समुदायले सधैँ प्रतिनिधित्व गर्ने साहसी, ऊर्जाशील र सीमाभन्दा बाहिर गएर सोच्ने अद्वितीय संस्कृतिलाई यस कार्यक्रमले प्रगाढ रूपमा प्रस्तुत गरेको छ।

एकै स्थानमा विविध कला, खेलकुद र साङ्गीतिक प्रस्तुतिहरूलाई कुशलतापूर्वक समेट्दै सम्पन्न भएको यस कार्यक्रमले युवाहरूको प्रतिभालाई उजागर गर्नुका साथै सम्पूर्ण सहभागी तथा दर्शकहरूलाई एक अविस्मरणीय अनुभव प्रदान गरेको छ।