काठमाडौं । पर्साको पकहाँ मैनपुर गाउँपालिका–१, धोरेमा धान रोप्ने क्रममा चट्याङ पर्दा सात जना महिला घाइते भएका छन्।

सिधौलिया जाने सीमावर्ती क्षेत्रमा धान रोपिरहेका बेला आज चट्याङ परेको जिल्ला प्रहरी कार्यालय पर्साले जनाएको छ। घटनामा परी पकहाँ मैनपुर–१ की ५५ वर्षीया शान्तिदेवी सहनी, ५५ वर्षीया राधिकादेवी सहनी, ५५ वर्षीया रितादेवी सहनी, ५२ वर्षीया कुश्मीदेवी सहनी, ४२ वर्षीया सन्ध्यादेवी, ३५ वर्षीया प्रमिला सहनी र ३५ वर्षीया संगीतादेवी घाइते भएका छन्।

प्रहरीका अनुसार, घाइतेमध्ये शान्तिदेवी सहनीको स्थानीय अस्पतालमा उपचार भइरहेको छ भने उनको अवस्था सामान्य छ। अन्य ६ जनालाई थप उपचारका लागि भारतको रक्सौलस्थित डंकन अस्पताल पठाइएको छ।

उपचाररतमध्ये कुश्मीदेवी सहनीको अवस्था गम्भीर रहेको छ भने बाँकी पाँच जनाको अवस्था मध्यम रहेको प्रहरीले जनाएको छ।