काठमाडौं । थाइल्याण्डको राजधानी बैंकक नजिकै शुक्रबार एक किशोरले आफ्नै हजुरबुबा-हजुरआमाको हत्या गरेपछि विद्यालयमा पुगेर कम्तीमा थप ६ जनाको गोली हानी हत्या गरेका छन्।

थाइल्याण्डको राष्ट्रिय प्रहरीले जारी गरेको वक्तव्यअनुसार ती किशोरले सुरुमा आफ्ना हजुरबुबाको पेस्तोल प्रयोग गरी हजुरबुबा-हजुरआमाको हत्या गरेका थिए। त्यसपछि बैंककको उत्तरी क्षेत्रमा रहेको एक माध्यमिक विद्यालयमा पुगेर ३ जना शिक्षक र ३ जना विद्यार्थीको गोली हानी हत्या गरेका हुन्।

समाचार एजेन्सी एएफपीका अनुसार शुक्रबार नोन्थाबुरी प्रान्तस्थित ‘देबसिरिन नोन्थाबुरी स्कूल’ बाहिर ठूलो सङ्ख्यामा प्रहरी र आपत्कालीन उद्धारकर्मीहरू परिचालन गरिएका थिए। घटनालगत्तै आफ्ना बालबालिकालाई लिन अभिभावकहरू हतार-हतार विद्यालय पुगेका थिए भने स्तब्ध बनेका विद्यार्थी र कर्मचारीहरू बाहिर एक-अर्कालाई सम्हाल्दै रोइरहेका देखिन्थे।

“मलाई मरिन्छ कि भन्ने डर लागिरहेको थियो, र मेरो सपना पूरा गर्न पाउँदिन कि भन्ने चिन्ता थियो,” डाक्टर बन्ने लक्ष्य राखेकी १२ कक्षाकी विद्यार्थी पवारिसा मेलिसाले भनिन्, “मैले धेरै पटक गोली चलेको ठूलो आवाज सुनेँ, किनकि आक्रमणकारी हामीभन्दा ठीक माथिल्लो तल्लामा थियो जस्तो लाग्छ। मैले त भुइँमा गोली ठोक्किएको आवाजसमेत सुनेकी थिएँ।”

उपगृहमन्त्री पोलपी सुवन्चवीले स्थानीय टेलिभिजन ‘थाई पीबीएस’ सँग कुरा गर्दै १५ जना घाइते विद्यार्थीहरूलाई गोली नलागेको तर भाग्ने क्रममा चोटपटक लागेको जानकारी दिएका छन्।

स्थानीय सञ्चारमाध्यमहरूले अधिकारीहरूलाई उद्धृत गर्दै आक्रमणकारी सोही विद्यालयमा अध्ययनरत एक किशोरावस्थाका विद्यार्थी रहेको र उनको पनि मृत्यु भइसकेको जनाएका छन्।

केही समाचारमा प्रहरीको गोली लागेर ती किशोरको मृत्यु भएको उल्लेख छ भने केहीमा उनले आत्महत्या गरेको जनाइएको छ।

“यो अत्यन्तै भयानक घटना हो। यस्तो कहिल्यै हुनु हुँदैनथ्यो। हाम्रो देशमा यस्तो कसरी हुन सक्छ?” बैंककस्थित सरकारी भवनमा पत्रकारहरूसँग कुरा गर्दै प्रधानमन्त्री अनुतिन चानविराकुलले भने।

स्थानीय सञ्चारमाध्यमले सार्वजनिक गरेका तस्बिरहरूमा अभियुक्तले बैजनी रङ्गको विद्यालयको पोसाक (युनिफर्म) लगाएको र कालो झोला (क्रस-बडी ब्याग) बोकेको देखिन्छ, भने भुइँमा गोलीका कैयौँ खोकाहरू छरिएका छन्।

एएफपीका पत्रकारका अनुसार विद्यालय परिसरमा एक दर्जन मनोचिकित्सक तथा स्वास्थ्यकर्मीहरूको टोली पुगेको छ भने वरपरको यातायात ठप्पप्रायः बनेको छ।

दक्षिण एसियाली क्षेत्रमा थाइल्याण्ड सबैभन्दा बढी बन्दुक सर्वसाधारणको पहुँचमा रहेको देशमध्ये एक हो। यहाँ करिब १ करोड बन्दुकहरू प्रचलनमा रहेको अनुमान छ, जुन प्रतिसात जना बासिन्दा बराबर एक बन्दुक पर्न आउँछ।

बन्दुकसम्बन्धी कानुनी व्यवस्था कडा बनाउने विगतका प्रतिबद्धताहरूका बाबजुद यस्ता गोलीकाण्डका घटनाहरू दोहोरिन छाडेका छैनन्।

यसअघि गत फेब्रुअरीमा देशको दक्षिणी भागमा रहेको एक विद्यालयमा गोली चलाएर प्रधानाध्यापकको हत्या गर्ने र दुई विद्यार्थीलाई घाइते बनाउने एक किशोरलाई थाई प्रहरीले गोली हानेर पक्राउ गरेको थियो। ती किशोरले गोलीकाण्डमा एक प्रहरी अधिकारीको हतियार प्रयोग गरेका थिए।

त्यतिबेला स्थानीय प्रहरी प्रमुखले अभियुक्त डिसेम्बरमा मानसिक उपचारका लागि अस्पताल भर्ना भएको र पछि डिस्चार्ज भएको बताएका थिए। ती किशोरले घटनाअघि एक प्रहरी अधिकारीलाई चक्कु प्रहार गरी उनको ९ एमएमको पेस्तोल खोसेका थिए र त्यसैबाट आक्रमण गरेका थिए।

त्यसैगरी, सन् २०२२ मा एक पूर्वप्रहरीले बन्दुक र चक्कुसहित देशको उत्तरी भागमा रहेको एउटा बालस्याहार केन्द्र (नर्सरी) मा अन्धाधुन्ध आक्रमण गरी २४ जना बालबालिका र १२ जना वयस्कसहित ३६ जनाको हत्या गरेका थिए, जुन थाइल्याण्डको इतिहासकै सबैभन्दा घातक नरसंहारमध्ये एक थियो।