काठमाडौं । उत्तरी चीनमा ७० वर्षकी एक वृद्ध महिलालाई बाकस (कफिन) मा राखिएपछि जीवित भएको घटना सार्वजनिक भएको छ। चीनको हेबेई प्रान्तकी ती महिला विगत केही दशकदेखि ‘सेरेब्रल थ्रोम्बोसिस’ (मस्तिष्कघात/रगत जम्ने समस्या) बाट पीडित थिइन् र उनी क्यान्सरसँग पनि जुधिरहेकी थिइन्।

डाक्टरहरूले उनको क्यान्सर उपचार असम्भव रहेको निष्कर्ष निकालेपछि परिवारका सदस्यहरूले उनलाई अन्तिम स्याहारसुसारका लागि घर ल्याएका थिए।

सेप्टेम्बर ८ मा आफन्तहरूले उनको शरीरमा कुनै जीवनको लक्षण नदेखेपछि बाहिर रहेका परिवारका सदस्यहरू अन्तिम बिदाइका लागि नआउन्जेल शव सुरक्षित राख्न उनलाई ‘रेफ्रिजरेटेड’ (चिस्यानयुक्त) कफिनमा राखेका थिए।

तर, त्यसको भोलिपल्ट साँझ उनकी बुहारीले कफिनभित्रबाट सुस्त गुनगुनाएको आवाज सुनेकी थिइन्। परिवारका सदस्यहरूले तुरुन्तै ती वृद्धालाई कफिनबाट बाहिर निकालेका थिए।

सेप्टेम्बर ११ मा आफन्तहरू आइपुग्दा ती महिला चेतनामा आइसकेकी थिइन् र आँखा खोल्न सक्ने भएकी थिइन्। यद्यपि, उनको अवस्था निकै गम्भीर थियो र उनी केही खान वा पिउन असमर्थ थिइन्।

दुःखद कुरा, सोही रात उनको निधन भयो र सेप्टेम्बर १३ मा परिवारका सदस्यहरूको उपस्थितिमा उनको अन्तिम संस्कार गरियो। परिवारका एक सदस्यले यो घटना सामाजिक सञ्जालमा सेयर गरेपछि यसको सत्यतामाथि प्रश्न उठेको थियो।

यसबारे पोस्ट गर्ने व्यक्तिले आफ्नो बचाउ गर्दै भनेका छन्, “कसैले पनि आफ्नै परिवारको सदस्यको जीवन र मृत्युलाई लिएर झूटा कथा बनाउँदैन।” केही स्थानीय बासिन्दाहरूले पनि गाउँमा यो घटनाबारे सुनेको बताएका छन्।

एक गाउँले अधिकारीका अनुसार आफन्तहरू फर्किने प्रतीक्षा गर्दा शवलाई चिसो राख्न परिवारले कफिनको ‘डीप-फ्रीजिङ’ मोडको सट्टा ‘रेफ्रिजरेसन’ क्षमताको प्रयोग गरेका थिए।

त्यस अवस्थामा ती महिलाको शारीरिक गतिविधि अत्यधिक न्यून रहेको र सोही प्रबन्धका कारण उनमा पुनः जीवनको लक्षण देखिएको मानिएको छ।

डाक्टरहरूका अनुसार यो घटना ‘एप्यारेन्ट डेथ’ को अवस्था हुन सक्छ, जसमा मानिसको जीवनका मुख्य सूचकहरू पत्ता लगाउन अत्यन्तै कठिन हुन्छ।

‘हेल्थ टाइम्स’ का अनुसार यस्तो अवस्थामा रहेका व्यक्तिहरूको श्वासप्रश्वास र मुटुको धड्कन अति सुस्त हुन्छ, पाचन तथा मेटाबोलिक प्रक्रिया सुस्त हुन्छ र व्यक्ति गहिरो कोमामा जान्छ।

चिकित्सकहरूले मृत्युको घोषणा गर्दा कडा मापदण्डहरू अपनाउँछन् र बिरामीमा जीवनका लक्षणहरू नदेखिए तापनि पुनरुत्थानका प्रयासहरू जारी राख्छन्। यो असामान्य घटनाले चिनियाँ सामाजिक सञ्जालमा ठूलो चर्चा सिर्जना गरेको छ।

एक प्रयोगकर्ताले टिप्पणी गरेका छन्, “यस प्रकारको ‘पुनर्जीवन’ ती महिलाका लागि पक्कै पनि कष्टकर अनुभव रह्यो होला। आशा छ उनले मृत्युपछिको संसारमा शान्ति पाएकी छन्।”

अर्का प्रयोगकर्ताले लेखेका छन्, “परिवारले पहिले अस्पतालबाट औपचारिक मृत्युको प्रमाणपत्र लिनुपर्थ्यो।”

त्यस्तै, तेस्रो प्रयोगकर्ताले परम्परागत शोक रीतिरिवाजलाई सम्झिँदै भनेका छन्, “विगतमा परिवारहरूले मृतकलाई तीन दिनसम्म घरमै राख्ने गर्थे। आजभोलि सबै कुरा यति छिटो भइसक्यो कि केही मानिसहरूलाई मृत्यु घोषणा हुनेबित्तिकै दाहसंस्कार गरिन्छ।”