काठमाडौं। पछिल्लो २४ घण्टाको अवधिमा देशका विभिन्न स्थानमध्ये पाल्पाको अर्चलेमा सबैभन्दा बढी वर्षा दर्ता भएको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार शुक्रबार दिउँसो १:१५ बजेसम्मको तथ्यांकअनुसार पाल्पाको अर्चले मापन केन्द्रमा २०५.२ मिलिमिटर वर्षा भएको हो।

महाशाखाका अनुसार हाल नेपालमा मनसुनी वायुको प्रभाव सक्रिय रहेकाले देशका अधिकांश भू-भागमा निरन्तर वर्षा भइरहेको छ।

अत्यधिक वर्षाका कारण विभिन्न नदी तथा खोलाहरूमा जलस्तर बढेको छ भने सम्भावित बाढी र पहिरोको जोखिमलाई ध्यानमा राख्दै सर्वसाधारणलाई उच्च सतर्कता अपनाउन मौसम पूर्वानुमान महाशाखाले आग्रह गरेको छ। महाशाखाले २४ घण्टामा अन्य विभिन्न स्थानमा भएको वर्षाको विवरणसमेत सार्वजनिक गरेको छ।