काठमाडौं । राष्ट्रिय स्वतन्त्र पार्टी (रास्वपा)का सांसद डा. अमरेश कुमार सिंहले बालेन शाह नेतृत्वको वर्तमान सरकार पूरै पाँच वर्ष चल्ने दाबी गरेका छन्।

बिहीबार सिंहदरबारस्थित संसद् भवन परिसरमा सञ्चारकर्मीहरूसँग कुरा गर्दै सांसद सिंहले पार्टीभित्र कुनै पनि किसिमको आन्तरिक विवाद र अन्तरविरोध नरहेको स्पष्ट पारेका हुन्।

रास्वपाका सबै नेता तथा कार्यकर्ताहरू पूर्ण रूपमा एकजुट रहेको उल्लेख गर्दै उनले सत्ता पक्षमा रहे पनि संसद्मा जनताका मुद्दा र आवाज निरन्तर उठाउनु जनप्रतिनिधिको प्रमुख दायित्व भएको बताए।

‘जनताको ठूलो आशा र भरोसा बोकेको यस सरकारलाई असफल हुने कुनै छुट छैन,’ सांसद सिंहले भने, ‘सरकारलाई चौतर्फी सहयोग गरेर देशमा सकारात्मक परिवर्तन ल्याउन हामी पाँचै वर्ष निरन्तर काम गर्नेछौँ।’ उनले वर्तमान सरकारले आफ्नो पूर्ण कार्यकाल पूरा गर्दै देश र जनताको हितमा सफल काम गरेर देखाउने विश्वास व्यक्त गरे।