काठमाडाैं। नेपाली कांग्रेसको आगामी महाधिवेशनलाई भव्य र व्यवस्थित बनाउन काठमाडौंको खुलामंचमा तीव्र गतिमा तयारी अघि बढाइएको छ।

पार्टीको नीति तथा नेतृत्व चयन गर्ने सर्वोच्च निकाय महाधिवेशनको उद्घाटन समारोहका लागि खुलामंचलाई मुख्य स्थलका रूपमा चयन गरी भौतिक पूर्वाधार निर्माणको कामलाई द्रुत गति दिइएको छ।

महाधिवेशन व्यवस्थापन समितिका अनुसार देशभरबाट आउने हजारौं प्रतिनिधि, नेता, कार्यकर्ता तथा शुभेच्छुकहरूलाई सहज रूपमा सहभागी गराउन मञ्च निर्माण, डिजिटल प्रविधि जडान र सुरक्षा व्यवस्थापनको काम एकसाथ भइरहेको छ।

उद्घाटन समारोहका लागि केन्द्रीय नेताहरू, पूर्वपदाधिकारी, आमन्त्रित विदेशी पाहुना तथा विशिष्ट व्यक्तिहरू अटाउने गरी करिब ५० देखि १०० जना क्षमताको फराकिलो र सुरक्षित मञ्च तयार पारिँदैछ।

कार्यक्रम अवधिभर सहभागीहरूलाई घाम र पानीबाट जोगाउन खुलामंचको अधिकांश भूभाग समेट्ने गरी अस्थायी त्रिपाल तथा मण्डप ढाक्ने काम भइरहेको छ।

मञ्चभन्दा टाढा बस्ने सहभागीहरूले पनि स्पष्ट रूपमा कार्यक्रम हेर्न र सुन्न सकून् भन्नका लागि परिसरका विभिन्न स्थानमा ठूला-ठूला एलइडी स्क्रिनहरू र उच्च क्षमताका ध्वनि उपकरणहरू जडान गरिँदैछ।

ठूलो संख्यामा जनसहभागिता हुने भएकाले सुरक्षाका लागि पर्याप्त सुरक्षाकर्मी परिचालन, सिसीटिभी क्यामेरा जडानका साथै आपतकालीन स्वास्थ्य सेवाका लागि प्राथमिक उपचार कक्ष र एम्बुलेन्सको टोली तयारी अवस्थामा राखिने भएको छ।

यसका साथै खुलामंच परिसरमा खानेपानीको सहज आपूर्ति र सयौँ अस्थायी शौचालयहरू निर्माण भइरहेका छन्। महाधिवेशनलाई उत्साहजनक उत्सवका रूपमा सम्पन्न गर्ने लक्ष्यका साथ भौतिक पूर्वाधार र व्यवस्थापनका सम्पूर्ण कामहरू अन्तिम चरणमा पुर्याइएको छ।