काठमाडौं । पाकिस्तानको अशान्त बलुचिस्तान प्रान्तस्थित ग्वादर जिल्लाको जिवाणी तटीय क्षेत्रमा दुईवटा गस्ती डुङ्गा माथि भएको भीषण आक्रमणमा परी पाकिस्तानी कोस्ट गार्डका १३ जना जवानको मृत्यु भएको छ। पृथकतावादी सशस्त्र समूह ‘बलोच लिबरेसन आर्मी’ ले यस आक्रमणको जिम्मेवारी लिएको छ।

बिहीबार (अक्टोबर ११) मा जारी एक आधिकारिक वक्तव्यमा बीएलएले यस कारबाहीलाई आफ्नो विशेष समुद्री एकाइ ‘हम्माल म्यारिटाइम डिफेन्स फोर्स’ ले सफल रूपमा अन्जाम दिएको दाबी गरेको छ।

बीएलएका प्रवक्ता जियन्द बलोचका अनुसार सङ्गठनले १३ अप्रिल २०२६ मा आफ्नै विशेष म्यारिटाइम विङ को औपचारिक स्थापना गरेको थियो।

यस विङले आफ्नो पहिलो समुद्री कारबाही सोही समयमा मीलतियाब क्षेत्रमा चलाएर पाकिस्तानी नौसेनाको गस्ती डुङ्गामाथि हमला गरी ३ जना सुरक्षाकर्मीको हत्या गरेको दाबी गरेको थियो।

बीएलएका अनुसार यो विशेष समुद्री एकाइ बलुचिस्तानका तटीय क्षेत्रहरूको रक्षा गर्न र पाकिस्तानी सुरक्षा निकायहरूको जलमार्गबाट हुने मुभमेन्टलाई रोक्ने उद्देश्यले खटाइएको छ।

दक्षिण बलुचिस्तानमा अवस्थित रणनीतिक ग्वादर बन्दरगाह लामो समयदेखि द्वन्द्वको केन्द्रबिन्दु रहँदै आएको छ।

चीनले यस बन्दरगाहलाई आफ्नो अति महत्त्वाकांक्षी ‘बेल्ट एन्ड रोड इनिसिएटिभ’ अन्तर्गतको ‘चीन-पाकिस्तान आर्थिक करिडोर’ को सबैभन्दा महत्त्वपूर्ण हिस्सा मान्दै आएको छ, जसबाट चीनलाई सीधै अरब सागरसम्म पहुँच प्राप्त हुन्छ।

स्थानीय बलोच समुदाय र बीएलएले यस परियोजनाको कडा विरोध गर्दै आएका छन्। उनीहरूको आरोप छ कि उनीहरूको जमिन खोसिएको छ, प्राकृतिक स्रोतसाधनको दोहन बाह्य शक्तिहरूले गरिरहेका छन् र स्थानीयहरूले न त रोजगार पाएका छन् न त क्षेत्रको विकास नै भएको छ।

पहिले शान्त तटीय सहरका रूपमा रहेको ग्वादरमा अहिले भारी मात्रामा पाकिस्तानी सेना र सुरक्षाकर्मीहरूको तैनाथी गरिएकाले स्थानीय नागरिकहरूमाझ सङ्घीय सरकार र चीनप्रति आक्रोश झनै बढेर गएको छ।