काठमाडौं। नबिल बैंक लिमिटेडले ग्राहकहरूको डिजिटल बैंकिङ अनुभवलाई थप सहज, सुरक्षित र आधुनिक बनाउने उद्देश्यका साथ ‘नबिल भर्चुअल क्रेडिट कार्ड’ सञ्चालनमा ल्याएको छ। यही असोज २९ गते बिहीबारदेखि सुरु भएको यो सेवा बैंकको ‘एनबैंक’ एपमार्फत सजिलै प्राप्त तथा प्रयोग गर्न सकिने बैंकले जनाएको छ।

कम्पनीका अनुसार अब ग्राहकहरूले परम्परागत क्रेडिट कार्ड लिनका लागि गर्नुपर्ने कागजी प्रक्रिया र अन्य formal झन्झटहरू व्यहोर्नु पर्ने छैन। बैंकले आफ्नै डेटामा आधारित विश्लेषणात्मक प्रणालीमार्फत योग्य ग्राहकहरूलाई पूर्व-स्वीकृत गरिसकेकाले योग्य ग्राहकहरूले एनबैंक एपको होमपेजमा रहेको ‘अपलाइ नाउ’ अप्सनमार्फत तुरुन्तै भर्चुअल क्रेडिट कार्ड प्राप्त गर्न सक्नेछन्।

पूर्ण रूपमा डिजिटल स्वरूपमा उपलब्ध यो कार्ड फोनपे मर्चेन्ट क्यूआरमार्फत गरिने भुक्तानीका लागि प्रयोग गर्न सकिने व्यवस्था मिलाइएको छ। यस सेवा सञ्चालनका लागि नबिल बैंक र फोनपे पेमेन्ट सर्भिस लिमिटेडबीच समझदारीपत्रमा हस्ताक्षर भइसकेको छ।

नबिल बैंकका प्रमुख कार्यकारी अधिकृत (सिइओ) मनोज कुमार ज्ञवालीले ग्राहकको सहजता नै बैंकको मुख्य प्राथमिकता रहेको बताएका छन्। “डिजिटल युगको आवश्यकताअनुरूप ग्राहकलाई बैंक शाखामै पुग्न नपरी बैंकिङ सेवा उपलब्ध गराउने दिशामा हामी निरन्तर काम गरिरहेका छौँ,” ज्ञवालीले भने, “नबिल भर्चुअल क्रेडिट कार्ड सोही प्रयासको एक महत्त्वपूर्ण हिस्सा हो।”

विगत चार दशकदेखि गुणस्तरीय बैंकिङ सेवा प्रदान गर्दै आएको नबिल बैंकले देशभर २६२ शाखा र ३१६ एटिएममार्फत २८ लाखभन्दा बढी ग्राहकहरूलाई सेवा दिँदै आएको छ।