काठमाडौं। अमेरिकी राष्ट्रपति पदको लागि जीतको नजिकै पुगिसकेका उम्मेदवार जो बाइडेनले राष्ट्रपति डोनाल्ड ट्रम्पको आक्रामक अभिव्यक्तिको निकै गम्भीर तरिकाले जवाफ दिएका छन् । बाइडेनले भने ‘हामी प्रतिद्वन्द्वी हुन सक्छौं तर हामी दुश्मन होइनौं । हामी अमेरिकी हौं ।’ ट्रम्पले राष्ट्रपति पदका विषयमा अहिले कानुनी कारवाही सुरु मात्रै भएकोले बाइडेनले पदमा दावी गर्न नहुने बताएपछि बाइडेनले यस्तो जवाफ दिएका थिए ।

बाइडेनले भने फेरि पनि राष्ट्रपति पदमा दावी गर्दै भनेका छन् ‘बित्दै गएको समयको साथमा यो प्रस्ट हुँदै गइरहेको छ कि रेकर्ड संख्यामा अमेरिकीहरु जसमा सबै जाति, धर्म र क्षेत्रका नागरिक छन् उनीहरुले परिवर्तनलाई रोजेका छन् ।’ आँकडाले आफूहरु जित्न गइरहेको स्पष्टसँग देखाएको बाइडेनले बताए । जनताले आफूहरुलाई कोभिडमाथि एक्सन लिने र अर्थव्यवस्थामा एक्सन लिने जनादेश दिएको बताउँदै बाइडेनले जनताले जलवायु परिवर्तन र संस्थागत नश्लवादविरुद्ध काम गर्ने जनादेश दिएको पनि बताए ।

आफूले जित्नेप्रति आश्वस्त बाइडेनले यो चुनावमा डेमोक्रेटहरुले ३ सयभन्दा धेरै इलेक्टोरल भोट पाउने बताए । बाइडेनले आफ्नो जीत सुनिश्चित भइसकेको बताउँदै आफूले राष्ट्रपतिको रुपमा गर्ने काममा पनि जुटिसकेको खुलासा गरेका छन् । बाइडेनले राष्ट्रपति पदमा बहाल भएको पहिलो दिन नै कोरोनाभाइरस नियन्त्रणका लागि एक्सन प्लान ल्याउने बताए ।