काठमाडौं। अमेरिकी राष्ट्रपतिमा निर्वाचित जो बाइडेनलाई विदेशी नेताहरुले पठाएका थुप्रै सन्देशहरु अमेरिकी विदेश मन्त्रालयमा त्यत्तिकै थुप्रिएका छन् तर ट्रम्प प्रशासनले बाइडेनलाई ती सन्देशहरु हेर्न नदिएको विदेश विभागका अधिकारीहरुले जनाएका छन् । यसअघि विदेश विभागले राष्ट्रपतिमा निर्वाचित उम्मेदवारलाई ती सबै सन्देशहरु हेर्न दिने प्रचलन थियो । तर, ट्रम्प प्रशासनले भने बाइडेनलाई ती सन्देशहरु उपलब्ध गराएको छेन ।

राष्ट्रपति डोनाल्ड ट्रम्पले बाइडेनको विजय स्वीकार नगरेकोले उनलाई ती सामग्रीहरु हेर्न नदिइएको बताइएको छ । सीएनएनको रिपोर्टअनुसार ट्रम्प प्रशासनले आधिकारिक सरकारी संयन्त्रमा पहुँच नदिएपछि बाइडेनको टिमले आफ्नै तरिकाले विदेशी नेताहरुसँग सम्पर्क गरिरहेको छ र बाइडेन स्वयंले दैनिक कैयौं फोन वार्ताहरु गर्ने गरेका छन् । बाइडेनले जर्मन चान्सलर एन्जेला मोर्केल र क्यानडाका प्रधानमन्त्री जस्टिन ट्रुडोलाई व्यक्तिगत रुपमा फोन गरेको रिपोर्टमा जनाइएको छ । व्यक्तिगत रुपमा विदेशी नेताहरुसँग सम्पर्क गर्दा बाइडेनले अमेरिकी विदेश विभागले उपलब्ध गराउने अनुवादक र अन्य सुविधा प्रयोग गर्न पाएका छैनन् ।

बाइडेनलाई विदेश मन्त्रालयमा सन्देश प्राप्त गर्न र विभागले उपलब्ध गराउने सुविधाहरु प्रयोग गर्नबाट मात्र रोकिएको छैन, मंगलबार विदेश मन्त्री माइक पोम्पियोले समेत बाइडेनको विजय स्वीकार गर्न अस्वीकार गरे । उनले आक्रोशित रुपमा दोस्रो ट्रम्प प्रशासन सुरु हुने बताए । बाइडेनलाई राष्ट्रपतिको दैनिक ब्रिफ भनिने इन्टेलिजेन्स ब्रिफिङ पनि सुन्न दिइँदैन र ब्रिफिङ ट्रम्पसँग मात्र गरिन्छ । विदेशी नेताहरुले पनि अमेरिकी सरकारले आफूहरुलाई बाइडेनसँग सम्पर्क गर्न नदिने कुरा बुझ्न थालेका छन् र उनीहरुले बाइडेनसम्म पहुँचको लागि ओबामाको समयका कूटनीतिज्ञहरुमार्फत बाइडेनसँग सम्पर्क गर्न थालेका छन् ।