काठमाडौं। अमेरिकामा हजारौं मानिसहरुले लाइन लागेर निःशुल्क खाद्यान्न लिएर गएका छन् । टेक्सास राज्यको ड्यालसमा यो सप्ताहान्तमा खाद्यान्न वितरण कार्यक्रममा हजारौं कारहरु लामबद्ध देखिएका थिए । खाद्यान्न वितरण गर्ने आयोजकले अहिले आवश्यकता अत्याधिक बढेको बताएका छन् । नर्थ टेक्सास फूड बैंक (एनटिएफबी)ले शनिबार ६ लाख पाउण्डभन्दा धेरै खाद्यान्न २५ हजार भन्दा धेरै जनताको लागि वितरण गरेको प्रवक्ता एन्ना कुरियनले बताइन् ।

कुरियनले सीएनएनलाई बताएअनुसार कार्यक्रममा ७ हजार २ सय ८० टर्की वितरण गरिएका थिए । एनटिएफबीले उपलब्ध गराएका तस्वीरमा एनटिएफबीको फेयर पार्कमा रहेको ड्राइभ थ्रु मोबाइल पेन्ट्रीमा हजारौं कारहरु लामबद्ध देखिएका छन् । कुरियनले महामारीसँगै खाद्यान्नको आवश्यकता अत्याधिक बढेको बताइन् । गत हप्ता टेक्सास १० लाख संक्रमणका केस रिपोर्ट गर्ने पहिलो राज्य बनेको थियो ।

‘हामीले संघर्ष गरिरहँदा हाम्रो लागि प्रार्थना भइरहेको मैले देखेकी छु र नर्थ टेक्सासले हामीलाई सहयोग गरेकोमा सम्मान व्यक्त गर्न चाहन्छु’ खानाको लागि लाइनमा पर्खने क्रममा ड्यालसकी बासिन्दा समन्था वुड्सले सीएनएन सम्बद्ध केटीभीटीसँग भनिन् ‘यो अद्भूत छ र म भगवानलाई धन्यवाद दिन चाहन्छु कि आज बिहान म लाइनमा बस्न सकें ।’ नोभेम्बर १४ को कार्यक्रममा नर्थ टेक्सास फूड बैंकले ६ लाख किलो खाद्यान्न वितरण गरेको थियो ।

अर्को एक कारमा लाइनमा बसेकी अर्की एक महिलाले आफूले कठिन परिस्थितिमा संघर्ष गरिरहेको बताइन् । ‘मैले डिसेम्बरदेखि काम गरिरहेकी छैन । मैले काम पाउन सकिन र मेरो बेरोजगारी भत्ता पनि काटियो । अहिले खाद्यान्न पाउनु निकै ठूलो कुरा हो । एनटिएफबीकी अध्यक्ष त्रिशा कनिंघमले असाधारण समयमा सहयोग गरेकोमा आफ्नो टिम र समुदायप्रति गर्व रहेको बताइन् ।