काठमाडौं। रुसी विपक्षी नेता अलेक्सेइ नभाल्नीले रुसी एफएसबी स्टेट एजेन्टलाई झुक्याएर आफ्नो हत्याको लागि बनाइएको पूरा योजनाको पर्दाफास गरेका छन् । बीबीसीका अनुसार नभाल्नीले ती रुसी एजेन्टलाई झुक्याएर आफ्नो हत्या नोभिचोक एजेन्टबाट गराउन खोजिएको योजनाबारे खुलासा गरेका हुन् । बीबीसीका अनुसार नभाल्नीले एक रुसी सुरक्षा अधिकारीलाई ती एजेन्टलाई फोन गर्न लगाएका थिए ।

अनुसन्धान संस्था बिलिङक्याटका अनुसार फोनमा कोन्स्तानिन कुद्रयाव्तसेभ नामका ती एजेन्टले नोभिचोक (एक प्रकारको विषाक्त रासायनिक पदार्थ) नभाल्नीको भित्री वस्त्रमा राखिएको बताएका थिए । अहिले बर्लिनमा स्वास्थ्यलाभ गरिरहेका नभाल्नीले लामो फोन वार्ता युट्युबमा पोस्ट गरेका छन् । गएको अगष्टमा उडिरहेको एक रुसी जहाजमा उनी विषको प्रभावले ढलेका थिए । जुन घटनामा उनको झण्डै ज्यान गएको थियो ।

बिलिङक्याटका अनुसार ती एजेन्ट कुद्रयाव्तसेभलाई गरिएको फोन रुसको संघीय सुरक्षा सेवा (एफएसबी)को ल्याण्डलाइनबाट आएको देखिने गरी सेट गरिएको थियो । कुराकानीमा नभाल्नीले एक बरिष्ठ सुरक्षा अधिकारी बनेर कुरा गरेका थिए जसले नभाल्नीलाई मार्ने एफएसबी अपरेशनको पूरा विवरण मागेका थिए । कुद्रयाव्तसेभले जहाज उडाइरहेका पाइलटको द्रूत निर्णय र साइबेरियाको ओम्स्कको मेडिकल टिम नभाल्नीलाई मार्ने योजना सफल नहुनुको कारण भएको बताएका थिए ।