काठमाडौं । युक्रेनी सहर मारिउपोलबाट शनिबार २० जना सर्वसाधारणको एउटा समूह औद्योगिक क्षेत्रबाट भागेको थियो, जहाँ करिब १,००० मानिस फसेको बताइएको छ।

युक्रेनको दक्षिणी सहर मारिउपोलमा रहेको अजोभ्सतल स्टिलवर्क्स नामको यो क्षेत्र त्यो भाग हो जहाँ अझै पनि युक्रेनी सेनाको नियन्त्रण छ। रुसी राष्ट्रपति भ्लादिमिर पुटिनले गत हप्ता विशाल औद्योगिक क्षेत्रलाई सिल गर्ने आदेश जारी गरेपछि २० व्यक्तिको यो पहिलो समूह बाहिरिएको हो।

त्यहाँ फसेका एक हजार व्यक्तिलाई मुक्त गर्न वार्ता भइरहेको बताइएको छ। यसैबीच रुसले युक्रेनको पूर्वी भागमा आफ्नो आक्रमणलाई तिव्रता दिने घोषणा गरेको छ ।

त्यसको करिब एक हप्ता अघि जब रूसले मारियुपोल कब्जा गरेको दाबी गरेको थियो, राष्ट्रपति पुटिनले आफ्ना सेनाहरूलाई यस औद्योगिक क्षेत्रलाई पूर्ण रूपमा बन्द गर्न भनेका थिए ताकि त्यहाँबाट झिंगा पनि बाहिरिन नसकोस्।

तर रुसी मिडियाका अनुसार करिब २५ जना सर्वसाधारण यहाँबाट कुनै न कुनै रूपमा बाहिर निस्कन सफल भएका छन् । यीमध्ये ६ बालबालिका १४ वर्षभन्दा कम उमेरका छन्, तर टोली कहाँ गयो थाहा छैन ।

स्टिलवर्क भित्रका सैनिकहरूले यसको पुष्टि गरेका छन्, यद्यपि उनीहरूले करिब २० जनालाई छोडेको बताएका छन्। मारियुपोलका मेयर वादिम बोयचेन्कोले बीबीसीलाई भने कि हामी कति घण्टा र दिन आफ्नो सुरक्षा गर्न सक्षम हुनेछौं भन्न गाह्रो छ।

यसअघि शनिबार दक्षिण-पश्चिमी सहर ओडेसामा एकपछि अर्को गरी तीनवटा भयानक विस्फोटको आवाज सुनिएको थियो।