काठमाडौं । भारतको राष्ट्रिय अनुसन्धान एजेन्सी (एनआईए) ले अन्डरवर्ल्ड डन दाउद इब्राहिमको जानकारी दिनेलाई २५ लाख रुपैयाँ इनाम घोषणा गरेको छ। संयुक्त राष्ट्र संघले सन् २००३ मा दाउद इब्राहिमको जानकारी दिनेलाई २.५ करोड भारतीय रुपैयाँ पुरस्कार घोषणा गरिसकेको अवस्थामा अब उनको टाउकोको मूल्य २ करोड ७५ लाख भारू पुगेको छ ।

अङ्ग्रेजी अखबार हिन्दुस्तान टाइम्सका अनुसार यो पुरस्कार राशि दाउद इब्राहिम र अन्य धेरै सहयोगीहरूको नाममा घोषणा गरिएको छ। दाउद इब्राहिमको ‘डी कम्पनी’ले हातहतियार, विष्फोटक पदार्थ, लागूऔषध र नक्कली भारतीय मुद्राको तस्करी र पाकिस्तानी संगठनसँग मिलेर भारतमा अतिवादी गतिविधि सञ्चालन गरेको मुद्दाको अनुसन्धानका क्रममा यो घोषणा गरिएको हो ।

अखबारले एक अधिकारीलाई उद्धृत गर्दै भनेको छ कि एनआईएले दाउद इब्राहिमका भाइ अनीस इब्राहिम उर्फ ​​हाजी अनीस, उनका नजिकका सहयोगी जावेद पटेल उर्फ ​​जावेद चिकना, शकील शेख उर्फ ​​छोटा शकील र इब्राहिम मुश्ताक अब्दुल रजाक मेमन उर्फ ​​टाइगर मेमनको जानकारी दिनेलाई पनि इनाम दिने घोषणा गरेको छ।

दाउद इब्राहिमलाई २५ लाख, छोटा शकीलको टाउकोको मूल्य २० लाख, अनीस इब्राहिम, चिकना र मेमनको जानकारी दिनेलाई १५–१५ लाख दिने घोषणा गरेको छ ।

दाउद इब्राहिम पाकिस्तानको कराँचीमा लुकेको विश्वास गरिन्छ। उनी सन् १९९३ को मुम्बई बम विष्फोटका साथै अन्य कैयौं मुद्दामा भारतमा वान्टेड छन्। संयुक्त राष्ट्र संघले सन् २००३ मा दाउद इब्राहिमको जानकारी दिनेलाई २.५ करोड रुपैयाँ पुरस्कार घोषणा गरिसकेको छ ।

एनआईएले यस वर्ष फेब्रुअरीमा दाउद इब्राहिम र उनका सहयोगीहरू विरुद्ध नयाँ मुद्दा दर्ता गरेको थियो। एनआईएलाई डी कम्पनीले पाकिस्तानी गुप्तचर एजेन्सी आईएसआई र केही चरमपन्थी संगठनहरूसँग मिलेर भारतमा विशेष इकाई बनाएको जानकारी प्राप्त भएको थियो। यसको उद्देश्य भारतका ठूला राजनीतिज्ञ र व्यापारीहरूलाई लक्षित गर्नुका साथै यहाँ चरमपन्थी हमलाहरू गराउनु हो।

यस प्रकरणमा अनुसन्धानको क्रममा एनआईएले मे महिनामा २९ ठाउँमा छापा मारेको थियो। एनआईए मुद्दाको आधारमा, प्रवर्तन निदेशालय (ईडी) ले पनि मनी लान्ड्रिंग अनुसन्धान सुरु गरेको थियो र फेब्रुअरी 23 मा महाराष्ट्रका पूर्व मन्त्री नवाब मलिकलाई गिरफ्तार गरेको थियो। नवाब मलिकमाथि दाउद इब्राहिमकी बहिनी हसिना पारकरको सहयोगमा कुर्लाका एक स्थानीय बासिन्दाको ३०० करोडको जमिन हडपाएको आरोप छ।