काठमाडौं । चट्याङ पर्ने सिङ्गो प्रक्रिया यति तीव्र हुन्छ कि मानिसले आँखा झिम्क्याउन पनि पाउँदैन। चट्याङको सबैभन्दा शक्तिशाली झट्का सेकेन्डको हजारौँ वा लाखौँ भागमा खस्छ, जबकि त्यसको चम्किलो प्रकाश करिब ०.२ देखि ०.५ सेकेन्डसम्म मात्र देखिन्छ।

यस्तो अवस्थामा चट्याङ परेको क्षण क्यामेरामा कैद हुनुलाई अत्यन्तै दुर्लभ मानिन्छ। अमेरिकाको ओहायो राज्यमा यस्तै एउटा चकित पार्ने घटना भएको छ, जसको भिडियो अहिले सामाजिक सञ्जालमा तीव्र रूपमा भाइरल भइरहेको छ।

घटना गत शुक्रबारको हो। अमेरिकाको ओहायो राज्यस्थित सिनसिनाटी नजिकै रहेको एउटा गल्फ कोर्समा तीव्र गर्जन र चमकका साथ आँधीहुरी आइरहेको थियो। त्यसै क्रममा एक व्यक्ति आँधी र आकाशमा चम्किरहेको बिजुलीको भिडियो रेकर्ड गरिरहेका थिए। त्यत्तिकैमा अचानक शक्तिशाली चट्याङ उनीमाथि नै खसेको देखिन्छ। चट्याङ लाग्ने बित्तिकै उनी भुइँमा पछारिन्छन्। यो सिङ्गो दुर्घटना क्यामेरामा रेकर्ड भएको छ।

One of the craziest videos I've ever seen. Man was struck by lightning while filming a storm on a golf course Friday in Cincinnati, Ohio. He was struck on the arm, but is recovering and tells me he is "unbelievably lucky." Remember, when thunder roars, go indoors! Credit: Chris S… pic.twitter.com/RrwuavQ5oa

— Matt Devitt (@MattDevittWX) August 9, 2026

अमेरिकाका मौसमविद् म्याट डेभिटले यस घटनाको जानकारी सामाजिक सञ्जाल प्लेटफर्म ‘एक्स’ (ट्विटर) मार्फत साझा गरेका हुन्। उनले ती व्यक्ति यस दुर्घटनामा जीवितै बच्न सफल भएको बताएका छन्। चट्याङ उनको हातमा परेको थियो, जसका कारण उनलाई चोटपटक लागेको छ, तर उनको ज्यान भने जोगिएको छ।

म्याट डेभिटले यस भिडियोलाई आफ्नो जीवनकै सबैभन्दा अचम्मलाग्दो भिडियोहरूमध्ये एक भनेका छन्। चट्याङको चपेटामा परेका ती व्यक्तिले पनि यति ठूलो दुर्घटनापछि पनि आफ्नो ज्यान बचेकामा आफूलाई अत्यन्तै भाग्यमानी मानेको बताएका छन्।

भिडियो भाइरल भएपछि हजारौँ मानिसहरूले यसमा प्रतिक्रिया दिएका छन्। धेरै प्रयोगकर्ताहरूले चट्याङ र मेघगर्जनका बेला कहिल्यै पनि रुखमुनि वा खुला मैदानमा उभिनु नहुने बताएका छन्।

एक प्रयोगकर्ताले लेखेका छन्, ‘यही कारण हो कि आँधीको समयमा रुखको छहारीमा शरण लिनु हुँदैन।’ त्यस्तै अर्का प्रयोगकर्ताले मौसम विभागका साइरनहरू कुनै कारणले बजाइने भएकाले मानिसहरूले तिनलाई सधैँ गम्भीरताका साथ लिनुपर्ने बताएका छन्।

अमेरिकाको ‘नेसनल वेदर सर्भिस’ का अनुसार चट्याङ गर्जन भइरहेका बादलहरूभन्दा धेरै किलोमिटर टाढासम्म पनि पर्न सक्छ। त्यसैले मेघगर्जन सुनिने बित्तिकै तुरुन्तै कुनै पक्की भवन वा बन्द सवारी साधनभित्र जानुपर्छ।

मौसमविद्हरूले गल्फ कोर्स, खुला मैदान, तालको किनार र एक्लै उभिएका रुखहरूपछाडि वा मुनि बस्नु चट्याङका बेला अत्यन्तै खतरनाक हुन सक्ने चेतावनी दिएका छन्।

‘नेसनल लाइटनिङ सेफ्टी काउन्सिल’ को तथ्याङ्कअनुसार माछा मार्नु, बोडिङ गर्नु, क्याम्पिङ गर्नु, साइकल चलाउनु र गल्फ खेल्नु जस्ता खुला ठाउँमा गरिने (आउटडोर) गतिविधिहरू चट्याङ पर्ने समयमा सबैभन्दा बढी जोखिमपूर्ण मानिन्छन्।