काठमाडौं । पाकिस्तानको एक आतङ्कवाद विरोधी अदालतले मानवअधिकार अधिवक्ता इमान मजारी र उनका श्रीमान् हादी अली चट्ठालाई १० वर्ष जेल सजाय सुनाएको छ।

साथै, अदालतले दुवै जनालाई दुई-दुई लाख पाकिस्तानी रुपैयाँ जरिवानासमेत गराएको छ।

यो मामला सन् २०२४ मा पाकिस्तानको क्रिकेट भ्रमणका क्रममा कथित रूपमा सुरक्षा व्यवस्थामा बाधा पुर्‍याएकोसँग सम्बन्धित छ।

यी दम्पतीमाथि इस्लामाबादमा सडकमा राखिएका ब्यारियरहरू हटाएको र प्रहरी अधिकारीहरूको काममा बाधा पुर्‍याएको आरोप थियो। दुवैले यी आरोपहरूलाई अस्वीकार गरेका छन्।

यसअघि, सेनाको आलोचना गरिएका सोसल मिडिया पोस्टको मामलामा इमान मजारी र हादी अली चट्ठालाई १७ वर्षसम्मको जेल सजाय सुनाइएको थियो।

पाकिस्तानको सर्वोच्च अदालतले अगस्टमा उक्त सजायहरूमाथि रोक लगाएको थियो, तर रिहा हुनुअघि नै प्रहरीले दुवैलाई फेरि गिरफ्तार गर्‍यो।

उनीहरू विगत केही महिनादेखि रावलपिन्डीको अदियाला जेलमा थुनामा छन्।

पछिल्लो मामला २५ अक्टोबर २०२४ को एक घटनासँग जोडिएको छ, जब इङ्ल्यान्डको क्रिकेट टोली पाकिस्तान भ्रमणमा थियो।

अभियोजन पक्षले आरोप लगाएको छ कि इमान मजारी र हादी अली चट्ठाले टोलीको सुरक्षा काफिलाका लागि तय गरिएको सडकमा राखिएका ब्यारियरहरू हटाइदिएका थिए।

साथै, उनीहरूले इस्लामाबादको एक प्रमुख चोक जिरो पोइन्टमा प्रहरी अधिकारीहरूको काममा बाधा पुर्‍याएका थिए।