काठमाडौं। युक्रेनको राजधानी किभमा रुसले गरेको मिसाइल आक्रमणको विश्वका धेरै देशले निन्दा गरेका छन् । अमेरिकाले रुसले विश्वविद्यालय र बालबालिकाको खेल मैदान लगायतका नागरिकलाई निशाना बनाएको बताएको छ । अमेरिकाले युक्रेनलाई सहयोग जारी राख्ने आश्वासन दिएको छ ।

संयुक्त राष्ट्रसंघका महासचिव एन्टोनियो गुटेरेसले आक्रमणबाट आफू अत्यन्तै स्तब्ध भएको बताएका छन्। रुसी राष्ट्रपति भ्लादिमिर पुटिनले क्रिमियालाई रुससँग जोड्ने एकमात्र पुलमा शनिबार भएको विस्फोटको प्रतिक्रियामा आक्रमण भएको बताएका छन् ।

युक्रेनले रुसले सोमबार ८३ वटा क्षेप्यास्त्र प्रहार गरेको र जसमध्ये ४३ वटा हवाई प्रतिरक्षा प्रणालीले निष्क्रिय पारेको दाबी गरेको छ । युक्रेनका राष्ट्रपति भोलोदिमिर जेलेन्स्कीले एक भिडियो सार्वजनिक गर्दै भनेका छन्, ‘युक्रेनलाई तर्साउन सकिँदैन । यी सबै कुराले उसलाई थप एकताबद्ध बनाउनेछ।’

राजधानी किभ बाहेक रुसले युक्रेनको ल्भिभ, खार्किभ, डिनिप्रो, जापोरिज्ज्यामा पनि आक्रमण गरेको थियो । यी शहरहरू विगतमा पनि रुसको निशानामा थिए र पछिल्ला महिनाहरूमा यहाँ धेरै विनाश भएको छ।

एक अधिकारीले सोमबारका यी आक्रमणमा झण्डै १४ जनाको ज्यान गएको र कैयौं घाइते भएको बताए । आक्रमणका कारण धेरै सहरमा बिजुली र पानी आपूर्ति अवरुद्ध भएको छ । युरोपेली संघले रुसले युद्ध अपराध गरेको र आतंक र क्रूरता प्रदर्शन गरेको बताएको छ ।

अमेरिकी राष्ट्रपति जो बाइडेनलगायत विश्वका धेरै देशका नेताहरूले युक्रेनका राष्ट्रपतिसँग कुराकानी गरेका छन् । बाइडेनले यी आक्रमणहरूलाई अत्यन्त क्रूर रूपमा वर्णन गर्दै भने कि अमेरिकाले युक्रेनलाई मद्दत गर्न जारी राख्नेछ र उन्नत वायु रक्षा प्रणाली उपलब्ध गराउनेछ।

अर्कोतर्फ, रुसी राष्ट्रपति भ्लादिमिर पुटिनले आक्रमणहरू केर्च ब्रिजमा शनिबार भएको विस्फोटको प्रतिक्रिया भएको र आफू युक्रेनमा “भयानक” आक्रमण गर्ने आदेश दिन लागेको बताएका छन्। उही समयमा, रुसी सुरक्षा परिषद्का उपप्रमुख दिमित्री मेट्वेदेवले भने, “यो आक्रमणको पहिलो एपिसोड मात्र हो। बाँकी एपिसोडहरु पनि आउनेछन् ।”